نوێنەری سەرۆك کۆمار ئامادەی پرسەی خوێندکارەکانی بەسڕە دەبێت و بریندارەکانیش بەسەردەکاتەوە
نوێنەری سەرۆك کۆمار راوێژکار جەمال محەممەداوی سەرەخۆشی و هاوخەمی سەرۆك کۆماری گەیاند بە خانەوادەی ئەو خوێندکارانەی لە پارێزگای بەسڕە بەهۆی روداوی ئۆتۆمبێل گیانیان لەدەستدا.
نوسینگەی راگەیاندنی سەرۆکایەتی کۆمار لە راگەیەندراوێکدا بڵاویکردەوە:-نوێنەری سەرۆك کۆمار لە میانی ئامادەبوونی لە پرسەکەدا ئاماژەی بەوەکرد، کە بەڕێز سەرۆك کۆمار بەهۆی پابەندبونەکانی لە بەغداد نەیتوانیوە لە پرسەکەدا لە بەسڕە ئامادەبێت. باسی لەوەشکرد، کە بەڕێز سەرۆك کۆمار جەختیکردۆتەوە لە پێویستی پێشکەشکردنی پشتیوانی و گرنگیدان بە خانەوادەی قوربانیان، کە تووشی ئەو روداوە بە ئازارە بون و یارمەتیدانیان بۆ تێپەڕاندنی ئەو بارودۆخە سەختە.
محەممەداوی دوپاتیکردەوە، کە سەرۆك کۆمار راستەوخۆ دوای روداوەکە لە نزیکەوە بەدواداچوونی کردوە.
هەروەها نوێنەری بەڕێز سەرۆك کۆمار ئەو بریندارانەی روداوەکەی بەسەرکردەوە، کە لە نەخۆشخانەی فێرکاریی سەدر و نەخۆشخانەی فێرکاری مەوانی چارەسەر وەردەگرن و سڵاوی سەرۆك کۆماری پێگەیاندن و هیوای چاکبونەوەی خێرای بۆ خواستن.



