بارزانی: دەنگەکانتان سبەی ئایندەی عێراق دروست دەکات و هێزی سیاسی کوردستان دەسەلمێنێت

19:19 2025-11-10 24188 كوردستان 0

2025-11-10

24188

نێچیرڤان بارزانی سه‌رۆكی هه‌رێمی كوردستان له‌په‌یامێكدا داوای به‌شداریكردن له‌ پرۆسه‌ی هه‌ڵبژاردنی په‌رله‌مانی عێراق ده‌كات كه‌ سبه‌ینێ به‌ڕێوه‌ده‌چێت و راشیده‌گه‌یه‌نێت، "ده‌نگدان پێگه‌ی هه‌رێمی كوردستان له‌ عێراقدا به‌هێزتر و ده‌نگی له‌ به‌غدا دلێرتر ده‌كات" و ده‌شڵێت، "ئه‌ركی هه‌مومانه‌ ڕویه‌كی جوانی دیموكراسی و شارستانیی هه‌رێمی كوردستان نیشان بده‌ین".
نێچیرڤان بارزانی له‌په‌یامێكدا سه‌باره‌ت به‌به‌ڕێوه‌چونی ده‌نگدانی گشتی بۆ په‌رله‌مانی عێراق رایگه‌یاندوه‌، "داوا له‌ هه‌مو ئه‌وانه‌ ده‌كه‌م كه‌ مافی ده‌نگدانیان هه‌یه‌، به‌شدارییه‌كی كارای تێدا بكه‌ن، به‌ شێوه‌یه‌كی شارستانی و ئازادانه‌ ده‌نگ بده‌ن، چاره‌نوس و داهاتوی نیشتمان، جێبه‌جێكردنی ده‌ستور و چه‌سپاندنی باشتری فیدڕاڵی، به‌ به‌شداری و ده‌نگی ئێوه‌، دیاریده‌كرێت".

ئاماژه‌ی به‌وه‌شكردوه‌، "ده‌نگدان ماف و ئه‌رك و په‌یام و ئه‌مانه‌ته‌، به‌رپرسیاریه‌تییه‌كی نیشتمانی و ده‌رفه‌تێكی نوێبونه‌وه‌یه‌ بۆئه‌وه‌ی به‌ ده‌نگی ئازادتان، قۆناغی داهاتوی پرۆسه‌ و ژیانی سیاسی له‌ عێراق وێنا بكه‌ن، به‌شدار و هاوبه‌ش بن له‌ به‌دیهێنانی زیاتری سه‌قامگیریی سیاسی، خزمه‌تگوزاریی باشتر، پێشكه‌وتن و ژیانێكی شایسته‌ بۆ هه‌موان".

هه‌ر له‌په‌یامه‌كه‌یدا نێچیرڤان بارزانی ده‌ڵێت، "ده‌نگدان، پابه‌ندیتانه‌ به‌ مافه‌كانتان و به‌ پته‌وكردنی پێگه‌ی هه‌رێمی كوردستان له‌ عێراقی فیدڕاڵیدا، به‌شداریی فراوانتان له‌ ده‌نگداندا، پێگه‌ی هه‌رێمی كوردستان له‌ عێراقدا به‌هێزتر و ده‌نگی له‌ به‌غدا دلێرتر ده‌كات، په‌یامێكی ڕون ده‌نێرێت له‌سه‌ر پابه‌ندیی گه‌لی كوردستان به‌ دیموكراسی و ژیانی هاوبه‌ش و گفتوگۆ بۆ بنیاتنانی داهاتویه‌كی گه‌شتر بۆ گه‌لی كوردستان و هه‌مو پێكهاته‌كانی عێراق".
نێچیرڤان بارزانی داواشی له‌ لایه‌نه‌ په‌یوه‌ندیداره‌كان كردوه‌، "به‌وپه‌ڕی به‌رپرسیاریه‌تی و پیشه‌یییانه‌، به‌ڕێوه‌چونی پرۆسه‌ی ده‌نگدانێكی بێگه‌رد و ئازاد، ‌به‌ ڕێكوپێكی و ئارامی مسۆگه‌ر بكه‌ن. لایه‌نه‌ سیاسییه‌كانیش به‌رپرسیارانه‌ و به‌پێی یاساكان، مامه‌ڵه‌ له‌گه‌ڵ به‌ڕێوه‌چونی پرۆسه‌كه‌دا بكه‌ن و هه‌مو لایه‌ك له‌گه‌ڵ كۆمسیۆنی باڵای سه‌ربه‌خۆی هه‌ڵبژاردندا هاریكار بن، ئه‌ركی هه‌مومانه‌ ڕویه‌كی جوانی دیموكراسی و شارستانیی هه‌رێمی كوردستان نیشان بده‌ین" و ده‌شڵێت، "هه‌مو ده‌نگێك بۆ كوردستان گرنگه‌، ده‌نگ بده‌ و له‌ وێناكردنی داهاتوی خۆت و وڵاته‌كه‌دا به‌شدار به‌".