حكومەتی هەرێم بڕیاریدا كە، دەبێت سەرجەم وەزارەت و لایەنە نەبەستراوەکانی سەر بە وەزارەتەکان، پابەند بن بە لیستی موچەی مانگی (كانونی دوەم/1)ی ئەمساڵەوە لەڕوی ژمارەی فەرمانبەران و بڕی خەرجی و شایستە داراییەکان، هەروەها دەشڵێت، "دامەزراندن بە هەمو شێوازێک ڕادەگیرێت، واتا دامەزراندن بە کاتی، لەجێ دانان، دامەزراندن لەسەر داهاتی ناوخۆ، دامەزراندنی وانەبێژان، وەرگرتنی خۆبەخشان، دامەزراندن بە گرێبەست و هەمیشەیی، ئەمانە هەمویان قەدەغەن".

بەگوێرەی نوسراوێكی حكومەتی هەرێم، كە واژۆی مەسرور بارزانی سەرۆكی حكومەتی لەسەرە و تێیدا 10 بڕیار دراون كە بریتین لە، "دەبێت سەرجەم وەزارەت و لایەنە نەبەستراوەکانی سەر بە وەزارەتەکان، پابەند بن بە لیستی موچەی مانگی (كانونی دوەم/1) ساڵی 2025، لەڕوی ژمارەی فەرمانبەران و بڕی خەرجی و شایستە داراییەکان، تاوەکو پەسەند کردنی خشتەی بودجەی ساڵ.
ئاماژەی بەوەشكردوە، "ڕاگرتنی دامەزراندن بە هەمو شێوازێک، واتا دامەزراندن بە کاتی، لەجێ دانان، دامەزراندن لەسەر داهاتی ناوخۆ، دامەزراندنی وانەبێژان، وەرگرتنی خۆبەخشان، دامەزراندن بە گرێبەست و هەمیشەیی، ئەمانە هەمویان قەدەغەن، تەنانەت گەڕانەوە بۆ وەزیفە یان هەر شێوازێکی دیکەی دامەزراندن، بۆ سەرجەم بوارەکان و هەروەها سڕینەوەی هەمو ئەو پلە وەزیفیانەی لە 2025 چۆڵ دەبن، تاوەکو پەسەندکردنی خشتەی بودجە".
بەگوێرەی بڕیارەكان، "ڕاگرتنی بەخشین و بەستنی دەرماڵەی نوێ بە هەمو شێوەیەک، پابەند بون بەو ڕێژە و دەرماڵانەی لە لیستی موچەی مانگی مانگی (كانونی دوەم/1)ی ئەمساڵ جێگیرکراون. هەروەها جەختکردنەوە لە قەدەغەکردنی دامەزراندن لە هەر وەزیفەیەکی سەرکردایەتی یان پلە تایبەت (بەڕێوەبەری گشتیی بەرەو سەرەوە)".
ئەوەشی خستەڕو، "قەدەغەکردنی گواستنەوەی ڕاژەی فەرمانبەران لەنێوان سەرجەم وەزارەت و دامەزراوەکان، بەبێ ڕەچاوکردنی سەرچاوەی داراییان بە شێوەی تەمویل زاتی بێت یان تەمویل مەرکەزی. واتا نابێت هیچ فەرمانبەرێک لە فەرمانگەیەک بۆ یەکێکی دیکە بگوزارێتەوە ئەگەر موچەکەی زیاد بکات".
لە بڕیارەكانی حكومەتدا ئەوەش هاتوە، "ڕاگرتنی هەژمارکردنی خزمەت جگە لە مەبەستی خانەنشینی، وەک ماوەی دەرکردنی سیاسیی، خزمەتی پارێزەرایەتی، خزمەتی گرێبەست، خزمەتی ڕۆژنامەنوسی و هەژمارنەکردنی بڕوانامەی نوێ بۆ ئەوانەی لەکاتی وەزیفەدا بڕوانامەی باڵاتر بەدەست دەهێنن، هەروەها کارکردن بە گشتاندنەکانی فەرمانگەی یاسایی دارایی وەزارەتی دارایی عێراق تایبەت بە سەرموچە و پلە بەرزکردنەوە بەهۆی نادیاری خەمڵاندنی سەقفی خەرجییەکانی ساڵی 2025.

باسی لەوەشكردوە، "دەبێت سەرجەم وەزارەتەکان پابەندبن بە بەرزنەکردنەوەی داواکاری درێژکردنەوەی ماوەی یاسایی تەمەنی خانەنشینی بۆ ئەنجومەنی وەزیران، بەهۆی حوکمی ماددەی 13 لە یاسای ژمارە 26ی 2019، درێژکردنەوەی ڕاژەی فەرمانبەر لەکاتی تەواوکردنی تەمەنی یاسایی هەڵوەشاوەتەوە، واتا کاتێک فەرمانبەر دەبێتە 60 ساڵ دەبێت خانەنشین بێت".
ئەنجومەنی وەزیران دەشڵێت، "کارکردن بە سەرجەم ئەو بڕیار و ڕێکارانە کاتییە، سەرتاسەریشە لە سەرجەم پارێزگاکانی کوردستان و عێراق، واتا تەنیا لە کوردستان نا، حکومەتی عێراقیش ئەو بڕیارانەی دەرکردون و جێبەجێیان دەکات".

لە كۆتا بڕیاری ئەنجومەنی وەزیراندا ڕونیكردوەتەوە، مەرجە گشت وەزارەتە و لایەنە نەبەستراوەکان بە بڕیارەکان پابەند بن، واتا لە فەرمانگەیەکی ئاساییەوە تاوەکو سەرۆکایەتی هەرێم و ئەنجومەنی وەزیران.