سودانی بۆ پزیشکیان: حکومەتی عێراق کار بۆ سەقامگیرکردنی ناوچەکە و پاراستنی ئاسایش دەکات

23:21 2026-03-11 23677 عێراق 0

2026-03-11

23677

ئەمڕۆ چوارشەممە"محەمەد شیاع سوودانی"سەرۆک وەزیرانی عێراق، لە پەیوەندییەکی تەلەفۆنیدا لەگەڵ "مەسعود پزشکیان"سەرۆک کۆماری کۆماری ئیسلامی ئێران، جەختی کردەوە لەسەر ئەوەی عێراق ئەو جەنگە ستەمکارانەی دژی ئێران بەڕێوە دەچێت ڕەت دەکاتەوە و شەرمەزاری دەکات.
نوسینگەی ڕاگەیاندنی سەرۆک وەزیران،لە بەیاننامەیەکدا، کەدەستی ئاژانسی موتەڵع کەوتووە ،تیایدا ڕایگەیاند: "سوودانی" لە پەیوەندییەکەدا بەناوی حکومەت و گەلی عێراقەوە سەرەخۆشیی خۆی بە بۆنەی شەهیدبوونی ڕێبەری باڵا ئایەتوڵڵا "سەید عەلی خامنەیی" و ئەندامانی خێزانەکەی و سەرجەم قوربانییانی گەلی ئێران دەربڕی و هیوای چاکبوونەوەی خێرای بۆ برینداران خواست.
وەک لە بەیاننامەکەدا هاتووە : سەرۆک وەزیران ،جەختی کردووەتەوە لەسەر ڕەتکردنەوە و شەرمەزارکردنی عێراق بۆ ئەو جەنگە ستەمکارانەی ئێران دەکاتە ئامانج، هەروەها جەختی لەسەر پەرۆشیی عێراق بۆ ئاسایش و سەلامەتی ناوچەکە و برایەتی گەلان کردووەتەوە .
"سوودانی" ئامادەیی عێراقی دەربڕیوە بۆ هەر هەوڵێک بە ئاڕاستەی کۆتاییهێنان بەو جەنگە و گەڕانەوە بۆ لۆژیکی دیالۆگ و چارەسەری ئاشتیانە، بەدوور لە زمانی هێز کە ئاسایش و سەقامگیریی هەرێمی و نێودەوڵەتی دەخاتە مەترسییەوە.
سەرۆک وەزیران ڕاشیگەیاند : لە کاتێکدا حکومەتی عێراق پەرۆشی ئاسایش و سەروەریی ئێرانە و ڕێگە بە هیچ لایەن یان کەسێک نادات خاکی عێراق وەک مەکۆیەک بۆ دەستدرێژیکردنە سەر ئێران بەکاربهێنێت،لەهەمان کاتدا ئەو هێرشانەی خاکی عێراق دەکەنە ئامانج پێشێلکردنی سەروەری و ئاسایشی عێراقن، ئەمەش کارێکی قبوڵنەکراوە و ئەو هەوڵانە تێکدەدات کە عێراق بۆ کۆتاییهێنان بە جەنگ و گەڕانەوە بۆ دیالۆگ دەیاندات.
لە بەرامبەردا "مەسعود پزشکیان" سوپاسی هەڵوێستەکانی عێراقی کرد لە ڕەتکردنەوەی لۆژیکی بەکارهێنانی هێز بۆ چارەسەرکردنی ناکۆکییەکان،هەروەها ستایشی هەوڵەکانی حکومەتی عێراقی کرد بۆ پاراستنی ئاسایش و سەقامگیریی ناوچەکە و جەختی لەسەر پەرۆشی وڵاتەکەی بۆ سەروەری و یەکپارچەیی خاکی عێراق کردەوە.