سودانی: کۆمپانیا ئەمریکییەکان بانگهێشت کراون بۆ بەشداریکردن لە ئەو گەشەسەندنەی کە عێراق بەخۆیەوە دەیبینێت

19:48 2025-01-26 78023 عێراق 0

2025-01-26

78023

سەرۆکی ئەنجومەنی وەزیران محەمەد شیاع سودانی لەمیانی پێشوازی لە جێگری سەرۆکی ژووری بازرگانی ئەمریکا دووپاتیکردەوە کە کۆمپانیا ئەمریکییەکان بانگهێشت کراون بۆ بەشداریکردن لە ئەو گەشەسەندنەی کە عێراق بەخۆیەوە دەیبینێت.
نوسینگەی ڕاگەیاندنی سەرۆکی ئەنجومەنی وەزیران لەڕاگەیەندراوێکدا کەئاژانسی موتەڵع بەدواداچوونی بۆ کردووە بڵاویکردەوە "سەرۆکی ئەنجومەنی وەزیران محەمەد شەیاع سودانی، ئەمڕۆ یەکشەممە پێشوازی کرد لە سەرۆکی ئەنجومەنی بازرگانی ئەمریکا عێراقی و جێگری سەرۆکی ژووری بازرگانی ئەمەریکا بەڕێز ستیڤ لۆتس.
هەر بەپێی ڕاگەیەندراوەکە له میانەی دیدارەکەدا پەیوەندییە بازرگانییەکان و هاوکارییەکانی نێوان عێراق و ئەمریکا خرانەڕوو، و هەوڵدان بۆ ئامادەکاری بۆ کۆڕبەندی نوێنەرانی کۆمپانیا ئەمریکییەکان، کە لە ماوەی ئەمساڵدا لە عێراق بەڕێوەدەچێت، هەروەها بەدواداچوون بۆ جێبەجێکردنی 18 ڕێککەوتن و یاداشتنامەی لێکتێگەیشتن کرا، کە ساڵی ڕابردوو لە سەردانەکەی بەڕێزیاندا بۆ ئەمریکا واژۆ کران.
سودانی ستایشی هەوڵەکانی لوتوس"ـی کرد لە سەرپەرشتی کردن و بەستنی کۆڕ و کۆبوونەوەکان، بەتایبەتی لەگەڵ کەرتی تایبەتی عێراقدا، و جەختی لەوە کردەوە کە حکومەت هەنگاوی گرنگی ناوە لەبوارە جیاجیاکانی چاکسازی ئابووری و گۆڕینی دیجیتاڵی بازرگانی و بانکدا، و ئاماژەی بە بەردەوام بوون کرد لە هەوڵەکان بۆ دەرکردنی یاسای خاوەندارێتی فکری و خستنەگەڕی ئەم چەمکە لە پڕۆگرامەکانی خوێندندا، بەمەبەستی هاوسەنگ بوون لەگەڵ گەشەسەندنی بازرگانی جیهانیدا.

سەرۆک وەزیران ئاماژەی بەوەشکرد کە چاکسازی ئابووری توانیویەتی ئاستی وەبەرهێنانی بیانی لەعیراقدا بەرزبکاتەوە و کۆمپانیا ئەمریکییەکان بانگهێشت کراون بۆ بەشداریکردن لە ئەو گەشەسەندنەی کە عێراق بەخۆیەوە دەیبینێت، هەروەها ژینگەی وەبەرهێنانی سەرنجڕاکێش و دۆستی بازرگانی.

لە لای خۆیەوە لۆتس ستایشی هەوڵەکانی حکومەتی عێراقی کرد لەبواری چاکسازیدا و جەختی لەخواستی زۆرێک لەکۆمپانیا ئەمریکییەکان کردەوە بۆ هاتنە ناوەوەی بازاڕی عێراق و دامەزراندنی هاوبەشی بەڵێندەر لەگەڵ کەرتی تایبەتی عێراق و بەشداریکردن لەگەشەپێدان و فراوانکردنی چالاکییەکانی بازرگانی و وەبەرهێنان.