سەرۆک کۆمار داوای سیاسەتێکی دادپەروەرانە دەکات بۆ زامنکردنی مافە ئاوییەکانی عێراق

17:43 2025-11-02 42077 عێراق 0

2025-11-02

42077

ئەمڕۆ یەکشەممە"لەتیف جەمال ڕەشید"سەرۆک کۆمار،پێشوازیکرد لە "هاکان فیدان" وەزیری دەرەوەی تورکیا و وەفدی هاوڕێی.
بەگوێرەی ڕاگەیەندراوێکی سەرۆکایەتی کۆمار ، کە دەستی موتەڵع کەوتووە ،تیایدا هاتووە: لە میانی دیدارەکەدا ، کە لە کۆشکی بەغداد بە ئامادەبوونی "فوئاد حسێن" جێگری سەرۆک وەزیر و وەزیری دەرەوە بەڕێوەچوو ، پەیوەندیی دووقۆڵی نێوان هەردوو وڵات لە بوارە جیاجیاکان و بابەتەکانی جێی بەرژەوەندی هاوبەش تاوتوێکرا ، هاوکات باس لە پێشهاتی ئیقلیمی و هەوڵەکانی چەسپاندنی ئاسایش و ئاشتی ناوچەکە کرا.
هەر بەگوێرەی ڕاگەیەندراوەکە : سەرۆک کۆمار پابەندبوونی عێراقی بە سیاسەتی کراوەیی و بنیاتنانی هاوبەشی و پاراستنی پەیوەندی باشی دراوسێیەتی لەگەڵ وڵاتانی ناوچەکە و جیهان دووپاتکردەوە،و جەختیکردەوە لەسەر نەگۆڕی سیاسەتی نیشتمانی لەسەر بنەمای ڕێزگرتن لە سەروەری و کاری لە پێشینە کە بەرژەوەندیی هاوبەش بپارێزێت.
وەک ڕاگەیەندراوەکە ئاماژەی پێداوە : سەرۆک کۆمار داوای گرتنەبەری سیاسەتێکی دادپەروەرانەی کرد سەبارەت بە پشکی ئاو کە مافی عێراق لە ڕووبارەکانی دیجلە و فورات دەستەبەر بکات، لەسەر بنەمای باشترکردنی بەڕێوەبردنی ئاو بۆ کەمکردنەوەی پاشەڕۆ و هەڵرژانی بەردەوامی ئاو.
لای خۆیەوە وەزیری دەرەوەی تورکیا، پەرۆشی وڵاتەکەی بۆ پتەوکردنی پەیوەندیی دووقۆڵیی لەگەڵ عێراق و کردنەوەی ئاسۆی نوێ بۆ هاریکاری لە بوارە جیاجیاکاندا دووپات کردەوە و داوایکرد دەرفەتەکانی هاریکاری فراوان بکرێن لە نێوان هەردوو وڵات بە شێوەیەک کە خزمەت بە بەرژەوەندیی هاوبەش بکات