عێراق تیمێکی نیشتمانی پێکدەهێنێت بۆ باشترکردنی ڕێژەی قەرزەکانی و پتەوکردنی ئاستی سەرنجڕاکێشی وەبەرهێنانەکەی

19:09 2025-08-20 29732 عێراق 0

2025-08-20

29732

ئەمڕۆ چوارشەممە، سەرۆكی ئەنجومەنی وەزیران محەمەد شیاع سودانی، ئاراستەی پێكهێنانی تیمێكی هاوبەشی نیشتمانی كرد بۆ باشتركردنی ڕێژەی قەرزەکانی عێراقی.
نوسینگەی راگەیاندنی سەرۆك وەزیران لە بەیاننامەیەكدا كەدەستی موتەڵع کەوتووە، دەڵێت: لەگەڵ هەوڵەكانی حكومەت بۆ بەهێزكردنی پێگەی دارایی و ئابووری عێراق لەسەر ئاستی نێودەوڵەتی، سەرۆكی ئەنجومەنی وەزیران محەمەد شیاع سودانی، ئاڕاستەی پێكهێنانی تیمێكی نیشتمانی هاوبەشی كرد، بە سەرۆكایەتی پارێزگاری بانكی ناوەندی عێراق، لەگەڵ نوێنەرانی وەزارەتەكانی (دارایی و نەوت و پلاندانان) و هەروەها دامەزراوە ئابوری و داراییە پەیوەندیدارەكان و نوسینگەی سەرۆك وەزیران و دەستەی كاغەزە داراییەكان و نوێنەرانی كەرتی بانكی عێراقی.
بەیاننامەكە ئاماژەی بەوەشكردووە: ئەم تیمە نیشتمانییە كاردەكات بۆ پەرەپێدانی ستراتیژییەكی یەكگرتوو كە ئامانجی ڕوون و پێوانەكراو لەخۆدەگرێت، ڕاپۆرتی خولیی پێشكەش بە لایەنە پەیوەندیدارەكان دەكات، هەروەها هەماهەنگی ڕاستەوخۆ لەگەڵ دەزگا گەورەكانی هەڵسەنگاندنی قەرزەکانی نێودەوڵەتی بەتایبەتی (Fitch, S&P, Moody‌s) دەكات، بە ئامانجی باشتركردنی ڕێژەی قەرزی سەروەری عێراق. هەروەها تیمەكە گرنگییەكی تایبەت دەدات بە بەهێزكردنی ئامرازەكانی حوكمڕانی، بەڕێوەبردنی مەترسییە داراییەكان، و پەرەپێدانی ژینگەی بازرگانی بەگوێرەی پلانەكانی چاكسازی ئابووری حكومەت.
رونیشیكردەوە: ئەم ڕێنماییە لە چوارچێوەی دیدگای حكومەتدا دێت بۆ گرتنەبەری ستراتیژێكی تۆكمەی نیشتمانی بە ئامانجی باشتركردنی ڕیزبەندی قەرزەکانی سەروەری عێراق، بەشداریكردن لە بەهێزكردنی متمانەی نێودەوڵەتی بە ئابووری نیشتمانی و كردنەوەی ئاسۆی فراوانتر بۆ وەبەرهێنانی دەرەكی ڕاستەوخۆ و ناڕاستەوخۆ. بەگوێرەی بەیاننامەكە، حكومەت دووپاتیكردەوە: ئەم هەنگاوە نوێنەرایەتی پابەندبوونێكی ڕوون دەكات بە ڕێبازی چاكسازییەكەی و پابەندبوونی بە گەیشتن بە سەقامگیری ئابووری، پاڵپشتیكردنی سەقامگیریی سیستەمی دارایی، و دابینكردنی ژینگەیەكی سەرمایەگوزاری سەرنجڕاكێش كە بەشدارە لە هەمەچەشنكردنی سەرچاوەكانی داهات و كەمكردنەوەی پشتبەستن بە نەوت وەك تاكە سەرچاوەی سەرەكی.