هێرشی چڕ بۆ سەر شێخ مەقسود دەستیپێكرد و بە توندی بەرپەچ دەدرێتەوە

22:43 2026-01-09 19176 كوردستان 0

2026-01-09

19176

گروپەكانی سەر بە حكومەتی كاتی سوریا هێرشی چڕیان بە تانك و تۆپ بۆسەر گەڕەكی شێخ مەقسود لە شاری حەلەب دەسپێكرد و هێزەكانی ئاسایشی ناوخۆ بەتوندی روبەڕوی گروپەكانی دیمەشق بونەتەوە، هاوكات ئەمشەو دو هێرشی دیكەیان پوچەڵكردوەتەوە و شەڕڤانان كۆبونەوەیەكی گەورەی گروپ و میلیشیاکانی حکومەتی دیمەشقیان لە دەوروبەری گەڕەکی شێخ مەقسود کردە ئامانج.
میدیاكانی ڕۆژاڤای كوردستان لەزاری هێزەكانی ئاسایشی ناوخۆ لە حەلەب بڵاویانكردەوە، شەڕ لە شێخ مەقسود دەستپێكردەوە و بەجۆرەها چەكی قورس بۆردومانی گەڕەكەكە دەكەن و بە تانکەوە هەوڵی پێشڕەوی دەدەن، بەڵام هێزەكانی ئاسایش بەتوندی روبەڕوی گروپەكانی دیمەشق بونەتەوە.

ئاماژەی بەوەشكرد، "ئەمشەو گروپە چەكدارەكانی عەمشات و حەمزات و نورەدین زەنکی كە لەلایەن توركیاوە پاڵپشتی دەكرێن، لەگەڵ گروپە چەكدارەكانی سەربە حکومەتی سوریا، دوجار هەوڵیاندا لە ناوچەی وادی زەیتونەوە هێرش بکەنە سەر گەڕەکی شێخ مەقسود، بە پاڵپشتی تانک و چەکی قورس، ئاسایشی ناوخۆ هەوڵەکانیان پوچەڵکردەوە و ناچاریان کردن پاشەکشە بکەن".
بەگوێرەی ئاژانسی فەرمی سوریا، گروپە چەكدارەكانی سەربە دیمەشق، شێخ مەقسودیان وەك ناوچەكی سەربازی داخراو راگەیاندوە و لە كاتژمێر 6.30 ئێوارەی ئەمڕۆوە قەدەغەی هاتوچۆیان ڕاگەیاندوە وەك ئامادەكاری بۆ گەڕێكی تری بۆردومانی گەڕەكی شێخ مەقسود.

هاوكات ناوەندی ڕاگەیاندنی هێزەکانی ئاسایشی ناوخۆی حەلەب كەمێك پێش ئێستا ڕاگەیاند، شەڕڤانانمان كۆبونەوەیەكی گەورەی گروپ و میلیشیاکانی حکومەتی دیمەشقیان لە دەوروبەری گەڕەکی شێخ مەقسود کردە ئامانج و زیانی گیانیان پێگەیاندن

دەشڵێت، "شەڕ و پێکدادانەکان بە توندی بەردەوامن، لە کاتێکدا تۆپبارانی توند و بەردەوامی میلیشیاكان هەمو ناوچە نیشتەجێبووەکانی ناو گەڕەکەکە دەکەنە ئامانج، بە نەخۆشخانە و دامەزراوە خزمەتگوزارییەکانیشەوە".
ماوەی چوار رۆژە هێرشی سەختی گروپە چەکدارەکانی سەر بە حکومەتی سوریا بۆ سەر گەڕەکەکانی ئەشرەفیە و شێخ مەقسود بەردەوامە و شه‌وی رابردوش وه‌زاره‌تی به‌رگری سوریا رایگه‌یاند له‌كاتژمێر 3:00ی به‌ره‌به‌یانی ئه‌مڕۆ هه‌ینی تا كاتژمێر 9:00ی به‌یانی ئاگربه‌ست راده‌گه‌یه‌نن و مۆڵەت دەدەین بە هێزەكانی ئەو دو گەڕەكە خۆیان ڕادەست بكەن و بە پارێزراوی دەبرێنە ناوچەكانی هەسەدە. بەڵام ئەنجومەنی ئەو دو گەڕەكە ئەو داوایەیان ڕەتكردەوە و جەختیان لە "بەرگری تا مردن" كردوە.