پارێزگاری کەرکوک داوا لە هاوڵاتیان دەکات پارێزگاری بکەن لە پاکوخاوێنیی شارەکە ‏

23:32 2025-10-02 20507 كوردستان 0

2025-10-02

20507

پارێزگاری کەرکوک داوا لە هاوڵاتییانی پارێزگاکە دەکات، “به‌وپه‌ڕی خۆشه‌ويستی و دڵسۆزييه‌وه‌،‌ پارێزگاری بکەن له‌ پاكوخاوێنیی شاره‌ ئازيزه‌كه‌مان، كه‌ركوک و سه‌رجه‌م قه‌زا و ناحيه‌كانی”.
‏
‏رێبوار تەها، پارێزگاری کەرکوک لە پەیامێکدا رایگەیاند، “کۆمەڵانی خه‌ڵكی خۆشه‌ويستی كه‌ركوک، پاش چەند کاتژمێرێکی كه‌م، هه‌ڵمه‌تی بانگەشەی هه‌ڵبژاردنی کاندیدان له‌ چوارچێوه‌ی ليستە كێبڕكێكارەکان له‌ پارێزگا ئازيزه‌كه‌مان، كه‌ركوک، ده‌ستپێده‌كات؛ ‎له‌م ساته‌ گرنگەدا، بانگه‌وازێكی برایانه‌ و دڵسۆزانه‌ ئاراسته‌ی ئێوه‌ ده‌كه‌م، داوا له ‌سه‌رجه‌م خوشک و برايان له‌ رۆڵه‌كانی كه‌ركوک ده‌كه‌ين، كه‌ ئه‌م قۆناغه‌ بكه‌ن به‌ ده‌رفه‌تێک بۆ كێبڕكێی شه‌ريفانه‌ و پەیامێکی هۆشيارانه‌ بگەیەنن كه‌ گوزارشت لە هيوا و ئاواتی سه‌رجه‌م پێكهاته‌كانی كه‌ركوک بکات، بێ جیاوازی”.
‏
‏ئاماژەی بەوەشکرد، “‎با ئه‌م هه‌ڵمه‌ته‌ی هه‌ڵبژاردن بكه‌ين به‌ وێستگه‌یه‌ک بۆ بنيادنانی داهاتوویه‌كی هاوبه‌ش، كه‌ لێكگه‌يشتن و هاوكاریی تێدا زاڵبێت و ئه‌و ئاشته‌وایی، كۆمه‌ڵايه‌تی، ئاسايش و گه‌شه‌سه‌ندنه‌ پته‌وبكات، كه‌ به‌ده‌ستهاتووه‌ و كه‌ركوک به‌ره‌و بووژانه‌وه‌يه‌كی ئابوری، پيشه‌سازی و وه‌به‌رهێنان ببات، كۆتایی به‌ ساڵانێك لە قه‌يران و ئاسته‌نگه‌كان بهێنێت. ‎داواشتان لێده‌كه‌م، به‌وپه‌ڕی خۆشه‌ويستی و دڵسۆزييه‌وه‌،‌ پارێزگاری بکەن له‌ پاكوخاوێنیی شاره‌ ئازيزه‌كه‌مان، كه‌ركوک و سه‌رجه‌م قه‌زا و ناحيه‌كانی”.
‏
‏دەشڵێت، كه‌ركوک پێشکەوتنی به‌رچاوی له‌ بواری خزمه‌تگوزاری و پاكوخاوێنیی گشتیی به‌خۆيه‌وه‌ بينيوه‌؛‌ پێويسته‌ هه‌موومان هۆشيار و به‌رپرسيار بين له‌ پاراستنی، به‌تايبه‌ت له ‌ماوه‌ی بانگه‌شه‌ی هه‌ڵبژاردندا.
‏
‏جه‌ختیشدەکاتەوە له‌ گرنگیی پاراستنی يه‌كڕيزیی كۆمه‌ڵايه‌تی و رێزگرتن لە يه‌كتر‌، “چونكه‌ شكۆی كه‌ركوک بەندە بە ‌شكۆی پێكهاته‌کانیەوە و يه‌كڕيزيمان، نهێنیی هێز و سه‌رچاوه‌ی بووژانه‌وه‌يه‌تی؛ ئەم ئاهەنگی دیموکراسییە پيرۆزبێت له‌ هه‌مووان، شانازی به‌ هه‌موو هاوڵاتييه‌كی بەشەرەف و دڵسۆزی كه‌ركوكەوە دەکەین، کە بەپه‌رۆشە بۆ ئێستا و داهاتووی شاره‌كه‌ی”.