گرێبەستی "شاراوە" لەنێوان وەزارەتی تەندروستی و كۆمپانیایەكدا بۆ کڕینی ئامێری پزیشکی کراوە

18:42 2024-12-30 76610 كوردستان 0

2024-12-30

76610

بریكاری وەزارەتی تەندروستیی هەرێم رەخنە لە گرێبەستەكانی وەزارەتەكەی دەگرێت و دەڵێت: ئەو گرێبەستەی لەنێوان وەزارەتی تەندروستی و كۆمپانیایەكدا بۆ دابینكردنی ئامێری تاقیگەی نەخۆشخانە حكومییەكان كراوە قۆرخكارییە و بەهیچ شێوەیەک لە ئەنجوومەنی وەزارەت رەزامەندی وەرنەگیراوەو ئاگاداریش نین.
د. ڕهێل فەرەیدون، بریكاری وەزارەتی تەندروستیی ئەمڕۆ دووشەممە لە لێدوانێكدا بۆ پێگەی فەرمی یەکێتیی ڕاشیگەیاندووە، ئەم گرێبەستە تەنیا بۆ كڕینی ئامێری تاقیگەكان نییە، بەڵكو پێشتریش بۆ كڕینی دەرمانی شێرپەنجەش هاوشێوەی ئەم گرێبەستە كراوەو كڕینی دەرمانی شێرپەنجە بۆ كۆمپانیایەک قۆرخكراوە، هەرچەندە بڕیار وایە ئەم كارە نەبێتە هۆی بەرزبوونەوەی نرخی پشكنینەكان لەسەر هاوڵاتیان، بەڵام پێمان وایە بۆ حكومەت باشترە لەگەڵ چەند كۆمپانیایەک گرێبەست بكات بەمەبەستی كێبڕكێ لە دابەزاندنی نرخی ئامێرەكان نەك تەنیا كۆمپانیایەكی دیاریكراو.
بریكاری وەزارەتی تەندروستی وتوشیەتی: پێویست بو ئەو گرێبەستەی كە كراوە بەپێی رێكارە یاساییەكان بڕۆیشتایەو ئەنجومەنی وەزارەت و بەڕێوەبەرایەتی گشتی لێی ئاگاداربونایە، نەک بەو شێوەیەی ئێستا كە پێمانوایە قۆرخكارییە، چونكە تاوەكو ئێستا نازانین سوودی ئەم بڕیارە بۆ حكومەت و هاوڵاتی چییە؟.
د. رهێل ئاماژەی بەوەشدا، بۆ هاوڵاتی گرنگە كە نرخی پشكنینەكان لە تاقیگە حكومییەكان كەمبكرێنەوە، بۆ حكومەتیش گرنگە كە نرخی ئامێرەكان گونجاو بێت و باشترین كوالێتی پێشكەش بە نەخۆش بكات، ئەگەر ئەم دوو مەرجە رەچاو نەكرێن، كەواتە هۆكارێک لەپشت گرێبەستەكەوە هەیە.