ماکرۆن: فڕەنسا لەگەڵ لوبنان كاردەكات بۆ دیاركردنی سنور ئاوەدانکردنەوەو مەشق و ڕاهێنان به سوپا

23:19 2025-01-17 72524 عەرەبی و نێودەوڵەتی 0

2025-01-17

72524

ئیمانوێل ماکرۆن، سەرۆکی فڕەنسا لە میانی سەردانەكەی بۆ لوبنان ڕایگەیاند، لوبنان لەسەر ڕێگا ڕاستەكەیە و حكومەتی نوێ دەستیبەكاركردوە بۆ ئەوەی كۆمەڵگەی نێودەوڵەتی یارمەتی لوبنان بدەن لە ئاوەدانكردنەوەدا، دەشڵێت، "فڕەنسا لەگەڵ لوبنان كاردەكات بۆ دیاركردنی سنور، ئاوەدانکردنەوە، مەشق و ڕاهێنان به سوپا".

ئیمانوێل ماکرۆن، ئەمڕۆ هەینی لە میانی كۆنگرەیەكی ڕۆژنامەوانید لەگەڵ جۆزێف عەون سەرۆكی نوێی لوبنان لە كۆشكی سەرۆكایەتی لە بەیروت ڕایگەیاند، لوبنان لەسەر ڕێگای ڕاستەكەیە لەگەڵ جۆزێف عەونی سەرۆک کۆمار، ئەو دەستی بەكاركردوە بۆ ئەوەی كۆمەڵگەی نێودەوڵەتی یارمەتی لوبنان بدەن لە ئاوەدانكردنەوەی وڵاتدا.
ئاماژەی بەوەشكرد، فڕەنسا لەگەڵ لوبنان كاردەكات بۆ دیاركردنی سنور لە هێڵی شین، هاوكات کاردەکەن بۆ ئاوەدانکردنەوەی لوبنان، مەشق و ڕاهێنان به سوپای ئەو وڵاتە دەكەن و سەرەتا بە 500 سەرباز دەسپێدەكەن.
سەرۆكی فڕەنسا باسی لەوەشكرد، سەردانەكەی بە ئامانجی پتەوکردنی پەیوەندییە دوقۆڵییەکانی نێوان هەردو وڵاتە، هەروەها جەختکردنەوە لەسەر پشتیوانی بەردەوامی وڵاتەكەی بۆ لوبنان لە بوارەکانی سەروەری خاكی ئەو وڵاتە، سەقامگیری و چاکسازییە ئابورییەکان.

لایخۆیەوە جۆزێف عەون سەرۆك كۆماری لوینان ڕایگەیاند، دوای هەڵبژاردنی سەرۆک کۆمار و سەرۆک وەزیران، خەڵكی لوبنان متمانەیان بە دەوڵەتەکەیان بۆ گەڕاوەتەوە، هەروەها هەوڵدەدەن متمانەی جیهانیش بۆ لوبنان بگەڕێننەوە.