ئەمڕۆ چوارشەممە، نێچیرڤان بارزانی سەرۆکی هەرێمی کوردستان، تەئكیدیكردەوە: کردنەوەی باڵەخانەی نوێی کونسوڵخانەی ئەمریکا لە هەولێر، ڕەنگدانەوەی گرنگیی عێراقە لای ئەمریکا، هاوکات ئاماژەی به‌ پشتگيريى له‌ هه‌وڵ و هه‌نگاوه‌كانى سه‌رۆك دۆناڵد تره‌مپ كرد له‌پێناو چارەسەركردنى كێشه‌كان و چه‌سپاندنى ئاشتى له‌ ناوچه‌كه‌دا.

نێچیرڤان بارزانی لە وتەیەکدا لە میانی کردنەوەی باڵەخانەی نوێی کونسوڵخانەی ئەمریکا لە هەولێر، کە ئاژانسی هەواڵی موتەڵع بەدواداچوونی بۆ کردووە، رایگەیاند: به‌خێرهاتنێكى گه‌رمى مايكل ڕيگه‌س جێگرى وه‌زيرى ده‌ره‌وه‌ى ئه‌م‌ريكا ده‌كه‌م كه‌ به‌ تايبه‌تى بۆ ئه‌م ڕێوڕه‌سمه‌ سه‌ردانى هه‌ولێرى كردووه‌. به‌ خێر بێن بۆ هه‌ولێر، به‌خێر بێن بۆ هه‌رێمى كوردستان و عێراق، زۆر خۆشحاڵم به‌وه‌ى ئەمڕۆ پێكه‌وه‌ به‌شداريى لە ڕێوڕه‌سمى کردنەوەی تەلاری نوێی کونسوڵخانەی گشتيى ئەمریکادا لە هه‌رێمى كوردستان ده‌كه‌ين.

وتیشی: بوونی ئەم ناوەندە دیپلۆماسییە لێره‌، پەیامێکی سیاسیی ڕوونە دەربارەی گرنگیی هەولێر و هەرێمی کوردستان و دەرخەری ئەو هاوبەشییە قووڵه‌یە کە عێراق و هه‌رێمى كوردستان لەگەڵ ئه‌م‌ريكادا هەیەتی و پێكه‌وه دەیانبەستێتەوە.

جەختیشیكردەوە: پەیوەندیی ئێمە لەگەڵ ئه‌مريكادا، لەسەر بنەمای متمانە و به‌ها و کاری هاوبەش لە ماوەی زیاتر لە سێ دەیەدا بنیاد نراوە. هەر لە پرۆسەی دابینکردنی نه‌واى ئارام و سەپاندنی ناوچەی دژەفڕینه‌وه‌ لە ساڵانی نەوەدەکاندا تا ئێستا، ئه‌مه‌ريكا لە سه‌ختترين و هەستیارترین كاته‌كاندا هه‌ميشه‌ لەپاڵ گەلی کوردستاندا وەستاوە.

وتیشی: ساڵی 2003 لە کاتی ئازادکردنی عێراقدا، پێکەوە بووين. ساڵی 2014 کاتێک ڕووبەڕووی تیرۆر بووینەوە، هێزەکانی پێشمەرگە بە ئازایەتییەوە شانبەشانی هێزەکانی ديكه‌ى عێراقی و ئەمریکا و هاوپەیمانانی نێودەوڵەتی جەنگان. پێکەوە سەرکەوتوو بووین لە تێکشکاندنی ئەفسانەی داعش و ئازادکردنی شار و ناوچه‌كانى ژێر ده‌ستيان. ئەمانە لاپەڕەی لەبیرنەکراوی مێژوون و بناغەیەکی پتەویان دروست كردووە بۆ هاوبەشی لە ئایندەدا.

دووپاتیشیكردەوە: ئه‌مڕۆ کردنەوەی ئەم کۆمەڵگە کونسوڵییە له‌ هه‌ولێر، جەختکردنەوەیە لەسەر بەردەوامیی ئەم پەیوەندییە و پابەنديى ئه‌مه‌ريكايه‌ بە کارکردن لەگەڵمان لەپێناو ئاشتی و سەقامگیریدا. هەروەها ڕەنگدانەوەی متمانەيه‌تى بە پێشکەوتنی هەرێمی کوردستان، بە هاوبەشیمان لەگەڵ بەغدا و بە توانامان بۆ بنیادنانی نموونەیەکی سەرکەوتوو لە پێکەوەژیان و سەقامگیری لە هەرێمی كوردستاندا.

وتیشی: ئه‌مه‌ وه‌ك سەرەتای قۆناغێکی نوێ بۆ فراوانکردنی هەماهەنگی لە زۆر بواردا دەبینین: لە سیاسەت و ئاسایش، لە ئابووری و وەبەرهێنان، لە ڕۆشنبیری و پەروەردە و لە پەیوەندیی نێوان گەلاندا. ئێمە تەنها بەدوای پەیوەندیی حکوومەت لەگەڵ حکوومەتەوە نین، بەڵکوو خوازیاری پەیوەندیی نێوان کۆمپانیاکان، کۆمەڵگەکان و پەیوەندیی نێوان گەنجانمان و گەنجانی ئه‌مه‌ريكاين.

ئاماژەی بەوەشدا: سیاسەتی ئێمە لە هەرێمی کوردستان ڕوونە: دەمانەوێت کوردستان پردی پەیوەندی بێت نەک گۆڕەپانی ململانێ. ده‌مانه‌وێت وەک بەشێکی کاریگەر لە سەقامگیریی عێراق و ناوچەکەدا بمێنینەوە، بەردەوام دەبین لە کارکردن لەگەڵ بەغدا بۆ چارەسەرکردنی سەرجەم كێشه‌كان لەسەر بنەمای دەستوور و بەڕێوەبردنی وڵات لەڕووی سیاسی و كارگێڕی و یاسایيیەوە، بە شێوەیەک کە خزمەت بە سەقامگیریی هەموو عێراق بکات.

وتیشی: لە هەمانکاتدا و له‌ چوارچێوه‌ى عێراقى فيدراڵدا، له‌سه‌ر بنه‌ماى ڕێككه‌وتنى ستراتيژيى عێراق و ئه‌مه‌ريكا، پابەند دەبین بە هاوبەشیی ستراتیژییمان لەگەڵ ئه‌مه‌ريكا، چونکە بڕوامان وایە ئەم هاوبەشییە بنه‌مايه‌كى سەرەکییە بۆ ئاشتی و ئاسایش و پێشكه‌وتن.

راشیگەیاند: ئێمە به‌ ڕێز و پێزانينێكى زۆره‌وه‌ له پشتیوانیی ئه‌مه‌ريكا بۆ عێراق و هه‌رێمى كوردستان ده‌ڕوانين، چ لە ڕێگەی سەربازەکانیانەوە بێت کە قوربانییان داوە، یان لە ڕێگەی دیپلۆماتکارەکانیان بێت، یان لە ڕێگەی کۆمپانیا و وەبەرهێنەرەكانی ئەمه‌ریکی بێت کە بەشدارییان لە پەرەپێدانی هەرێمی كوردستان كردووە و جێی ڕێز و سوپاسێكی زۆرن.

وتیشی: بەناوی هەرێمی کوردستانەوە، سوپاس و پێزانینمان ئاراستەی گەل و ده‌وڵه‌تى ئەمه‌ریکا دەکەين بۆ پشتیوانیی بەردەوامیان لە ماوەی ساڵانی ڕابردوودا لە هەرێمی كوردستان.

رونیشیكردەوە: به‌ ته‌واوى پشتگيريى له‌ هه‌وڵ و هه‌نگاوه‌كانى سه‌رۆك دۆناڵد تره‌مپ دەكەین له‌پێناو چارەسەركردنى كێشه‌كان و چه‌سپاندنى ئاشتى له‌ ناوچه‌كه‌دا. هه‌روه‌ها ده‌ستخۆشى لێ ده‌كه‌ين بۆ دياريكردنى مارك ساڤايا وه‌ك نێرده‌يه‌كى تايبه‌ت به‌ عێراق. ئه‌مه‌ پێشهاتێكى گرنگه‌. هيوادارين ڕۆڵى خۆى بگێڕێت له‌ يارمه‌تيدانى عێراق و هه‌رێمى كوردستان له‌ هه‌موو ڕوويه‌كه‌وه‌.

بە ئومێد و ئیرادەوە دەڕوانینە پێکەوەكاركردن بۆ بنیادنانی داهاتوويه‌كى باشتر و سەقامگیر و ئاوەدانتر بۆ هەمووان