سەرکردایەتی هەرێم پێشوازی لە ڕێککەوتنی نێوان هەسەدە و حکومەتی دیمەشق دەکات

19:42 2025-03-11 103872 كوردستان 0

2025-03-11

103872

یەکێتیی نیشتمانیی کوردستان پشتیوانی بۆ ڕێککەوتنی نێوان مەزڵوم عەبدی و سەرۆکی سووریا دەردەبڕێت، "ئەمە هەنگاوێکی گرنگ و ئەرێنییە بە ئاڕاستەی بەهێزکردنی پێکەوەژیان و کاری هاوبەش لە سووریای نوێدا".
بافڵ تاڵەبانی، سەرۆکی یەکێتیی لە پۆستێکی سەبارەت بە ڕێککەوتنی نێوان هەسەدە و حکومەتی نوێی سووریا ڕایگەیاندووە، ئەم هەنگاوە کە مافی گەلەکەمان لە رۆژئاوا و تەواوی پێکهاتەکان دەپارێزێت، هیوادارین سەرەتایەکی نوێ بێت بۆ بنیادنانی وڵاتێکی دیموکراتی و گەل پەسەند کە دەستوور بنەمای کارکردن و هاوبەشیی بێت، "وەک هەمیشە پاڵپشت و پشتیوانی هەوڵەکانی برای بەڕێزم مەزڵوم عەبدی دەکەم لەپێناو بەرقەرارکردنی ئاشتی و سەقامگیری لە ناوچەکەدا".

هاوکات سەرۆکی هەرێم، نێچیرڤان بارزانی دەڵێت: پیرۆزبایی له‌ براكانمان له‌ سووریا ده‌كه‌ین بۆ ڕێككه‌وتنی نێوان به‌ڕێزان سه‌رۆکی سووریا و فه‌رمانده‌ی هێزه‌کانی سووریای دیموکرات (هه‌سه‌ده‌) كه‌ نه‌خشه‌ڕێگایه‌كی گونجاو بۆ داهاتوو و قۆناغێکی دروستی ڕاگوزه‌ر پێكدێنێت.

ئەمەش لەکاتێکدا دوێنێ دووشەممە 10ـی ئاداری 2025، سەرۆکایەتیی کۆماری سووریا واژووکردنی رێککەوتنێک لەنێوان مەزڵووم عەبدی و ئەحمەد شەرع، سەرۆکی سووریا ڕاگەیاند و بەپێی ڕێککەوتنامەکە، "هەسەدە دەبێتە بەشێک لە دامەزراوەی بەرگریی سووریا".
سەرۆکایەتی کۆماری سووریا رۆژی دووشەممە ڕایگەیاندووە، لەسەر بنەمای کۆبوونەوەی نێوان ئەحمەد ئەلشەرع، سەرۆکی سووریا و مەزڵوم عەبدی، فەرماندەی گشتیی هێزەکانی سووریای دیموکرات لە ڕۆژی دووشەممەدا، ڕێککەوتن لەسەر یەکخستنی سەرجەم دامەزراوە مەدەنی و سەربازییەکانی باکووری ڕۆژهەڵاتی سوریا و ڕۆژئاوای کوردستان، لەوانە دەروازە سنوورییەکان و فڕۆکەخانەکان و کێڵگەکانی نەوت و گاز لە دەوڵەتی سووریادا.
ڕێککەوتنی دووەم، دان بە کۆمەڵگای کوردی کە کۆمەڵگایەکی ڕەسەنە لە سووریادا و دەوڵەتی سووریاش مافی هاووڵاتیبوونی کورد و هەموو مافە دەستوورییەکانی مسۆگەر دەکات.
هەروەها مسۆگەرکردنی مافی سەرجەم سوورییەکان بۆ نوێنەرایەتی و بەشداریکردن لە پرۆسەی سیاسی و سەرجەم دامودەزگاکانی دەوڵەتدا، بەبێ هیچ جێوازیەکی نەتەوەیی و ئاینی.