فوئاد حسێن، جێگری سەرۆک وەزیران و وەزیری دەرەوەی عێراق ئه‌مڕۆ هەینی لە وەزارەتی دەرەوەی ئەمریکا لە واشنتن دی سی لەگەڵ مارکۆ ڕوبیو، وەزیری دەرەوەی ئەمریکا کۆبوەوە، ئەوەش لە چوارچێوەی سەردانە فەرمییەکەی بۆ ئەمریکا کە لە 24ی ئه‌م مانگه‌وه‌ دەستیپێکردوه‌، ڕوبیۆ پابەندبونی وڵاتەکەی بۆ پشتیوانیکردن لە سەقامگیری عێراق دوپاتکردەوە و ستایشی هەوڵە هاوبەشەکانی بەرەنگاربونەوەی داعشی کرد.

به‌گوێره‌ی ڕاگه‌یه‌ندراوێكی وه‌زاره‌تی ده‌ره‌وه‌ی عێراق، فوئاد حسێن و مارکۆ ڕوبیو، وەزیری دەرەوەی ئەمریکا  باسیان لە ڕێگاکانی چالاککردنی هاوکارییەکان کردوه‌، بەتایبەتی لە بوارەکانی سیاسی، ئەمنی و ئابوریدا، فوئاد حسێن جەختی لە گرنگی بەرزکردنەوەی هاوکاری ئەمنی و ئاڵوگۆڕی زانیاری بۆ بەرەنگاربونەوەی ڕێکخراوە تیرۆریستییەکان کردەوە.
ئاماژه‌ به‌وه‌شكراوه‌، هەردو وه‌زیری گەشبینی خۆیان بە ئایندەی پەیوەندییەکان دەربڕی و فوئاد حسێن ڕۆڵی ئەمریکا و سەرکردایەتی هاوپەیمانی نێودەوڵەتی بۆ بەرەنگاربونەوەی تیرۆری بەرز نرخاند، لایخۆیەوە ڕوبیۆ پابەندبونی وڵاتەکەی بۆ پشتیوانیکردن لە سەقامگیری عێراق دوپاتکردەوە و ستایشی هەوڵە هاوبەشەکانی بەرەنگاربونەوەی داعشی کرد.
له‌باره‌ی دۆخی ئابوریه‌وه‌، فوئاد حسێن وتویه‌تی، "عێراق دەستیکردوە بە هەنگاوی کۆنکرێتی بەرەو هەمەچەشنکردنی سەرچاوەکانی وزە و کەمکردنەوەی پشتبەستنی بە غازی هاوردەکراو".
ئه‌وه‌شی خستوه‌ته‌ڕو، عێراق هەوڵ دەدات بۆ بەدەستهێنانی سەربەخۆیی غاز و لە ماوەی چەند ساڵی داهاتودا، دەگاتە خۆبژێوی لەو بوارەدا، هەروەها دوپاتی کردەوە کە عێراق دەستی بە هاوردەکردنی کارەبا لە وڵاتانی دیکەوە کردوە و لەگەڵ وڵاتانی دیکەش تاوتوێی هاوردەکردنی غاز دەکات، داواشی لە کۆمپانیا ئەمریکییەکان کرد کە وەبەرهێنان لە عێراق زیاد بکەن و بەشداری لە پڕۆژە ستراتیژییەکانیدا بکەن.
لە چوارچێوەیەکی پەیوەندیداردا، هەردولا باسیان لە ڕێگاکانی بەرزکردنەوەی هاوبەشی ئابوری و بازرگانی کرد، بە ئاماژەدان بە سەردانی ئەم دواییەی شاندێکی کۆمپانیا ئەمریکییەکان و کەرتی تایبەت بۆ عێراق و ئەو دەرفەتەی کە نوێنەرایەتی دەکات بۆ بەرزکردنەوەی هاوکارییە ئابورییەکانی نێوان هەردو وڵات لە کەرتی گشتی و تایبەتدا. 
وەزیری ده‌ره‌وه‌ی عێراق تیشکی خستە سەر گرنگی سەرلەنوێ سەیرکردنەوەی هۆشدارییە ئەمنییەکان سەبارەت بە گەشتکردن بۆ عێراق، چونکە ئەو هۆشدارییانە کاریگەری نەرێنی لەسەر بونی کۆمپانیا ئەمریکییەکان هەیە، ئاماژەی بە دۆخی باشی ئەمنی لە عێراق و ئەگەری ئەوەش بۆ زیاتر ڕاکێشانی وەبەرهێنانی بیانی کرد، ئاماژەی بە هەندێک وڵاتی ئەوروپی کرد کە چاویان لە هەڵسەنگاندنی ئەمنی خۆیان کردەوە، لایەنی ئەمریکی تێگەیشتنی خۆی بۆ ئەو بابەتە دەربڕی.
له‌ ڕاگه‌یه‌ندراوه‌كه‌دا هاتوه‌، هەروەها لە دیدارەکەدا باس لە گرنگی ئەنجامدانی کۆبونەوەیەکی نوێی لیژنەی باڵای هاریکاری دو قۆڵی نێوان عێراق و ئەمریکا لە ماوەی مانگەکانی داهاتوی مانگی حوزەیران یان تەمموزدا کرا بۆ تاوتوێکردنی سەرجەم بوارەکانی هاوکاری لەسەر بنەمای ڕێککەوتنی چوارچێوەی ستراتیژی.

لە کۆبونەوەکەدا باس لە پێشهاتەکانی ناوچەکە و بەتایبەتی لە سوریا کرا، فوئاد حسێن جه‌ختی له‌ گرنگی ده‌ستپێكردنی پڕۆسه‌یه‌كی سیاسی هه‌ملایه‌نه‌ كرده‌وه‌ كه‌ ڕێز له‌ مافی هه‌مو پێكهاته‌كانی سوریا بگرێت و به‌شداربێت له‌ به‌رزكردنه‌وه‌ی سه‌قامگیری ناوچه‌كه‌.

فوئاد حسێن زیاتر وتی، "سەقامگیری سوریا کاریگەری ئەرێنی لەسەر ئاسایشی عێراق هەیە"، ئاماژەی بە پێویستی وریایی مامەڵەکردن لەگەڵ زیندانەکانی ژێر دەسەڵاتی هێزەکانی سوریای دیموکرات (هەسەدە) کرد، کە نزیکەی 10 هەزار لە مەترسیدارترین ئەندامانی داعش تێیدا دەستبەسەرن.