زیاتر لە 40 ملیۆن هاوڵاتی لە پرۆسەی نوێكردنەوەی داتاكانى وەزارەتی بازرگانی بەشدارن ‏

23:39 2025-05-30 78589 عێراق 0

2025-05-30

78589

وەزارەتی بازرگانی ڕایگەیاند: زیاتر لە 40 ملیۆن هاوڵاتی دەخرێنە ناو پرۆسەی نوێكردنەوەی داتاكانەوە، دوای ئەوەی پارێزگاكانی هەرێمی كوردستان و پارێزگای بەسرە بە فەرمی پەیوەست بوون بەو پرۆگرامە نیشتمانییە.
ئەمڕۆ هەینی ،‏وتەبێژی فەرمی وەزارەتەكە محەمەد حەنون كەریم، لە بەیاننامەیەكدا بڵاویکردەوە: لە چوارچێوەی هەوڵە بەردەوامەكانی وەزارەتی بازرگانی بۆ نوێكردنەوەی داتا و فراوانكردنی بنكەی سودمەندانی خزمەتگوزارییە حكومییەكان، زیاتر لە 40 ملیۆن هاوڵاتی عێراقی خراونەتە ناو پرۆسەی نوێكردنەوەی داتاكانەوە، دوای ئەوەی پارێزگاكانی هەرێمی كوردستان و پارێزگای بەسڕە بە فەرمی پەیوەست بوون بە داتا نیشتمانییەكان بۆ نوێكردنەوەی داتان.
‏حەنون ئاماژەی بەوەشكرد: كارەكان بەردەوامن بۆ دەستپێكردنی پرۆسەی نوێكردنەوە لە پارێزگاكانی زیقار و كەربەلای پیرۆز لە ماوەی هەفتەی داهاتوودا، ئەمەش لە چوارچێوەی پلانێكی تۆكمە بۆ گرتنەوەی سەرجەم پارێزگاكانی عێراق بەبێ جیاوازی.
‏حەنون داوای لە هاووڵاتیانی ئەو پارێزگایانە كرد كە لە ئێستادا نوێكردنەوەكە دەستیكردووە، دەستبەجێ داتاكانیان نوێبكەنەوە لە ڕێگەی ناوەندە دیاریكراوەكان یان پلاتفۆرمە ئەلیكترۆنییە پەسەندكراوەكانەوە، جەختیشیكردەوە: كە نوێكردنەوەی داتاكان هەنگاوێكی بنەڕەتییە بۆ دڵنیابوون لە بەردەوامی و پەرەپێدانی خزمەتگوزارییە حكومییەكان كە پێشكەش دەكرێن، هەروەها نوێنەرایەتی بناغەیەكی بنەڕەتییە بۆ بنیاتنانی سیستەمێكی دیجیتاڵی دادپەروەرانە و كاریگەر كە خزمەت بە هاوڵاتی عێراقی بكات.
‏تەئكیدیشیكردەوە: وەزارەت داوا لە سەرجەم دەزگاكانی ڕاگەیاندن و گروپە كۆمەڵایەتییەكان دەكات هاوكار بن لە بڵاوكردنەوەی هۆشیاری سەبارەت بە گرنگی ئەم پرۆسەیە، بە لەبەرچاوگرتنی كاریگەرییە ڕاستەوخۆكانی لەسەر باشتركردنی ئەدای حكومەت و بەرزكردنەوەی كارایی دابەشكردنی خۆراك و خزمەتگوزارییەكانی دیكە. وتیشی: بەردەوام دەبین لە ئاگاداركردنەوەی هاوڵاتیان لە پارێزگا تازە وەرگیراوەكان و هەنگاوەكانی داهاتووی مۆدێرنكردن.
‏