بەیاننامەیەکی هاوبەشی کوردستانى: بڕیاری ڕاگرتنی مووچەی فەرمانبەرانی کوردستان "بڕیارێکی تەواو سیاسییە"

17:31 2025-05-31 84014 كوردستان 0

2025-05-31

84014

لایەنە بەشدارەكانی كۆبونەوەكەی پیرمام لە ڕاگەیەندراوێكی هاوبەشدا بڵاویانكردەوە، كۆبونەوەكە بۆ تاوتوێكردنی دۆخی سیاسی هەرێم و عێراق و کێشە و گرفتەکانى نێوان هەرێم و حکومەتى فیدراڵ، بەتایبەتى دوا بڕیارى عێراق بۆ نەناردنى موچەى موچەخۆرانى هەرێمى. بۆیە بژاردەى گفتوگۆ و دانوستاندن بە باشترین ڕێگەچارە دەزانین بۆ ئەم قۆناغە، لەهەمان کاتدا گشت بژاردەکان بە کراوەیى دەبینن.

لایەنە بەشدارەكانی كۆبونەوەكەی ئەمڕۆ پیرمام لە ڕاگەیەندراوێكی هاوبەشدا بڵاویانكردەوە، كۆبونەوەكە بەمەبەسىتى تاوتوێکردنى دۆخى سیاسى کوردستان و عێڕاق و، کێشە و گرفتەکانى نێوان هەرێم و حکومەتى فیدراڵ، بەتایبەتى دوا بڕیارى نادەستورى و نایاسایی وەزارەتى دارایى حکومەتى فیدراڵ و ڕاگرتن و نەناردنى موچەى موچەخۆرانى هەرێمى کوردستان.
ئاماژەی بەوەشكرد، دواى گفتوگۆکردن و ڕاگوڕینەوەى پێویست لەسەر ئەم بابەتە، هەمو لایەنەکان هاوڕابوین لەوەى کە ئەم بڕیارە بڕیارێکى سیاسییە دژ بە ئیرادەى گەلى کوردستان و قەوارەى سیاسى و یاسایى هەرێمى کوردستان.

ئەو لایەنانە باسیان لەوەشكرد، بەپێى دەستورى هەمیشەیى عێراق و بڕیارى دادگاى فیدراڵى و یاساى فەرمانبەران و موچەخۆرانى عێراق و ڕێککەوتنەکانى نێوان حکوومەتى هەرێم و حکومەتى فیدراڵ، پێویستە حکومەتى فیدراڵى پابەند بێت بەئەرک و ئیلتیزاماتى خۆى بەرامبەر بە خەڵکى هەرێمى کوردستان و مافى موچەخۆرانى هەرێم تێکەڵ بە ململانێ سیاسییەکان نەکرێت.
ئەوەشی خستەڕو، حکومەتى فیدراڵ دور بکەوێتەوە لە سیاسەتى برسیکردن و فشارخستنە سەر هەرێمى کوردستان، لەبەرئەوەى ئەم سیاسەتە جگە لە قوڵکردنەوەى گرفتەکان، نادیدەگرتنى گۆڕانکارییە زۆر و خێراکانى ناوچەکەشە بۆیە لەبەرژەوەندى هیچ لایەکدا نابێت.
بەگوێرەی ڕاگەیەندراوەكە، وەکو هێز و لایەنە سیاسییەکانى گشت پێکهاتەکانى کوردستان وێڕاى سوپاس و پێزانینیان بۆ خۆڕاگرىی موچەخۆران و فەرمانبەر و پێشمەرگە و مامۆستایان و گەلى سەربەرزى کوردستان بەگشتى، دوپاتى دەکەنەوە کە هەڵوێست و بڕیار و هەنگاوەکانمین بە ئاراستەى بەرژەوەندىی هاوڵاتیان و هەرێمى کوردستان دەبێت.

دەشڵێت، "بژاردەى گفتوگۆ و دانوستاندن بە باشترین ڕێگەچارە دەزانین بۆ ئەم قۆناغە، لەهەمان کاتدا گشت بژاردەکان بە کراوەیى دەبینین لەبەردەممان لەپێناو بەرژەوەندییە باڵاکانى هەرێمى کوردستان".