ئەمڕۆ دووشەممە، وەزارەتی دارایی و ئابوری هەرێمی كوردستان لێبڕینی خانەنشی دیاركرد و چەسپاندنی لێبڕینی خانەنشینی (التوقيفات التقاعدية) بە ڕێژەی (10%) لە سەر فەرمانبەرانی هەرێمی کوردستان جێبەجێ دەكرێت. بەجۆرێك ئەگەر فەرمانبەرێک موچەی بنەڕەتییەکەی 509 هەزار دینار بێت، ئەوا لێبڕینەکەی دەکاتە 15 هەزار و 270 دینار.
‏
‏لە گشتاندنێكی وەزارەتی دارایی و ئابوری هەرێم، بە ژمارە 4753 كە ئەمڕۆ دەچوە و واژۆی ئاوات شێخ حەنابی وەزیری لەسەر و تێیدا هاتوە، پاڵپشت بە یاسای خانەنشینی یەکگرتو ژمارە (9)ی ساڵی (2014) و دوای بەکاربونی یاسای خانەنشینی یەکگرتو و جێبەجێکردنی بە پێی بڕیاری ئەنجومەنی وەزیرانی حکومەتی هەرێمی کوردستان  لێبڕینی خانەنشینی ئەنجامبدرێت.
‏بەگوێرەی ڕاگەیەندراوەكە، چەسپاندنی لێبڕینی خانەنشینی (التوقيفات التقاعدية) بە ڕێژەی (10%) لە سەر فەرمانبەرانی هەرێمی کوردستان دەبێت و بە لێبڕینی ئەو ڕێژەیەی کە دەکەوێتە ئەستۆی فەرمانبەران و ئەو خانەنشینانەی کە یاسای ئاماژەپێکراوی سەرەوە دەیانگریتەوە.
‏
‏لێبڕینەكە بەم شێوەیە دەبێت:
‏1- لێبڕینی ڕێژەی (2%) لە موچەی فەرمانبەران لە ڕێکەوتی (2014/1/1) تاکو (2024/6/30).
‏
‏2- لێبڕینی ڕێژەی (2%) لە موچەی فەرمانبەریتی خانەنشینان، ئەوانەی لە ئیستادا خانەنشینن و یاسای ئاماژەپێکراوی سەرەوە دەیانگریتەوە لە ڕێکەوتی (2014/1/1) تا ڕێکەوتی دەست لە کار هەڵگرتن و هەواڵە کردنیان بۆ خانەنشینی.
‏
‏3- بڕی پارەی کەڵەکەبوی سەر فەرمانبەران و خانەنشینان وەکو قەرز تۆمار دەکرێت لە ئەستۆی فەرمانبەران و خانەنشینان.
‏
‏4- قەرزی ئاماژەپێکراو لە خاڵی (سێیەم) لە ماوەی سێ ساڵ بۆ فەرمانبەران و ماوەی (5) ساڵ بۆ خانەنشینان پاکتاو بکرێت.
‏
‏5- ئەم لێبڕینە لە ڕێکەوتی (2025/6/1) دەستپێدەکات تاکو قەرزەکە پاکتاو دەکرێت.
‏لە گشتاندنەكەی وەزارەتی داراییدا ئەوەش ڕونكراوەتەوە، ئەگەر فەرمانبەرێک لە ساڵی 2014 موچەی بنەڕەتییەکەی 509 هەزار دینار بێت ئەوا لێبڕینەکە بەم شێوەیە دەبێت 509,000 زەڕبی 2%، بری لێبڕینەکە دەکاتە 15 هەزار و 270 دینار، هەمان فەرمانبەر لە ساڵی 2015 موچە بنەڕەتییەکەی بووبێتە 519  هەزار دینار ئەوا لێبڕینەکە بەم شێوەیە دەبێت 519,000 زەڕبی 2% بری لێبڕینەکە دەکاتە (15 هەزار و 570 هەزار دینار بۆ ساڵەکانی تریش بە هەمان شێوە بۆ سەرجەم فەرمانبەران ئەم لێبڕینە بکرێت.
‏
‏ئەوەشهاتوە، بۆ فەرمانبەران سەرجەم لێبڕینەکان کۆ دەکرێتەوە دابەشی (36) مانگ دەکرێت ئەوا ئەو بڕەی دەردەچێت مانگانە لە موچەی فەرمانبەران دەبڕدرێت تا قەرزەکە پاکتاو دەکرێت بۆ خانەنشینان لێبڕینەکان کۆدەکرێتەوە و دابەشی (60) مانگ دەکرێت ئەوا ئەو بڕەی دەردەچێت مانگانە لە مووچەی خانەنشینان دەبڕدرێت تا قەرزەکە پاکتاو دەکرێت.