بارزانی ماڵئاوایی لە باڵیۆزی ئەڵمانیا دەکات و دووپاتی دەکاتەوە: شەراکەتێکی ڕاستەقینە و دەستوورێکی جێبەجێکراومان دەوێت

18:15 2025-08-04 52043 كوردستان 0

2025-08-04

52043

مەسعود بارزانی، سەرۆكی پارتی دیموكراتی كوردستان ڕایگەیاند، شتێكی زیاتریان لەوە داوا نەكردوە كە لە دەستوری عێراقدا دیاری كراوە بۆ كورد، بەڵام بە کەمتریش رازی نابن کە دەستور بە گەل و هەرێمی کوردستان داوە. دەشڵێت، "تێگەیشتێنی باشترمان لەگەڵ یەكێتی هەیە و ئومێدەوارین پێش هەڵبژاردنەکانی عێراق کابینەی نوێی حکومەتی هەرێم پێکبهێنرێت".

بارەگای بارزانی ئەمڕۆ دوشەممە لە ڕاگەیەندراوێكدا بڵاویكردەوە، مەسعود بارزانی لە سەلاحەددین پێشوازی لە كریستیەن هۆهمەن باڵیۆزی ئەڵمانیا لە عێراق كرد و لە دیدارەکەدا کە باڵیۆزی ئەڵمانیا بە مەبەستی ماڵئاوایی و کۆتاییهاتنی ئەرکەکانی سەردانی بارزانی کردبو و ئاڵبێرت ڤۆن ویتكێ کونسوڵی گشتی ئەڵمانیا ئامادەیی بو.
مەسعود بازرانی لەمیانەی كۆبونەوەكەدا، سوپاسی ڕۆڵی ئەڵمانیا و یەکێتی ئەوروپای کرد بۆ پشتگیری لە قەوارەی دەستوریی هەرێمی کوردستان. لەبارەی بە پەیوەندییەکانی هەرێم و بەغداشەوە دەڵێت، "گەڕانەوە بۆ پڕەنسیپەکانی تەوافق و تەوازن و شەراکەت باشترین چارەسەرە و ئێمە دەمانەوێ دەستور جێبەجێ بکرێت".

دەشڵێت، "ئێمە شتێکی زیاتر لە چوارچێوەی دەستورمان داوا نەکردوە، بەڵام بە کەمتریش لەوە رازی نابین کە دەستور بە گەل و هەرێمی کوردستان داوە".
لە بارەی هەنگاوەکانی پێکهێنانی کابینەی نوێی حکومەتی هەرێم، مەسعود بازرانی باسی لەوەكردوە، دوای کۆبونەوەی هەردو مەکتەبی سیاسیی پارتی و یەکێتی تێگەیشتنی باشتر هەیە بۆ پێکهێنانی کابینەی نوێی حکومەتی هەرێم و ئومێدەوارن پێش هەڵبژاردنەکانی ئەنجومەنی نوێنەرانی عێراق کابینەی نوێی حکومەتی هەرێم پێک بهێنرێت.

هەر لەو دیدارەدا باڵیۆزی ئەڵمانیا، پشتیوانی وڵاتەكەی و وڵاتانی ئەوروپای بۆ پێگەی دەستوریی قەوارەی هەرێمی کوردستان دوپاتکردەوە و ئاماژەی بەوەدا کە بونی ژمارەیەکی بەرچاوی کونسوڵخانە لە هەرێم پەیامێکە کە دەبێت قەوارەی هەرێمی کوردستان پارێزگاری و بەرگری لێبکرێت.