مه‌سعود بارزانی بۆ مه‌زڵوم عه‌بدی: نابێت مافه‌كانی گه‌لی كورد پێشێل بكرێن

18:45 2025-11-19 40939 كوردستان 0

2025-11-19

40939

مه‌سعود بارزانی سه‌رۆكی پارتی دیموكراتی كوردستان له‌میانه‌ی پێشوازیكردنی له‌ مه‌زڵوم عه‌بدی فه‌رمانده‌ی هێزه‌كانی سوریای دیموكرات رایگه‌یاند، پێویسته‌ پرسی كورد به‌ شێوازێكی دیموكراسیانه‌ و ئاشتیانه‌ له‌ چوارچێوه‌ی سوریای تازه‌دا چاره‌سه‌ر ببێت و هه‌ڵه‌كانی رابردو چاره‌سه‌ر ببن و دوباره‌ نه‌بنه‌وه‌ و ناشبێت مافه‌كانی گه‌لی كورد پێشێل بكرێن".
به‌گوێره‌ی راگه‌یه‌ندراوێكی باره‌گای بارزانی، ئه‌مڕۆ چوارشه‌ممه‌ شاری دهۆك مه‌سعود بارزانی پێشوازی له‌ مه‌زڵوم عه‌بدی فه‌رمانده‌ی هێزه‌كانی سوریای دیموكرات كرد، له كۆبونه‌وه‌كه‌دا كه‌ محه‌مه‌د ئیسماعیل سه‌رۆكی ئه‌نه‌كه‌سه‌ و عوسمان بایده‌میر سیاسه‌تمه‌داری كوردی باكور و چه‌ند كه‌سایه‌تی و به‌رپرسی تری ڕۆژئاوا به‌شداربون، مه‌سعود بارزانی خۆشحاڵیی خۆی ده‌ربڕی كه‌ هه‌ردولایه‌ن به‌یه‌كه‌وه‌ به‌شدارن له‌ كۆڕبه‌ندی مێپس 2025 له‌ دهۆك و پاشان بیروڕا ئاڵوگۆڕ كرا له‌سه‌ر بارودۆخی سوریا و ناوچه‌كه‌.

مه‌سعود بارزانی ئاماژه‌ی به‌وه‌كردوه‌، پێویسته‌ پرسی كورد به‌ شێوازێكی دیموكراسیانه‌ و ئاشتیانه‌ له‌ چوارچێوه‌ی سوریای تازه‌دا چاره‌سه‌ر ببێت و هه‌ڵه‌كانی رابردو چاره‌سه‌ر ببن و دوباره‌ نه‌بنه‌وه‌،سه‌رۆك بارزانی جه‌ختی له‌ پشودرێژی و ته‌بایی و یه‌كریزی هێز و لایه‌نه‌ سیاسیه‌كانی كورد كرده‌وه‌ و و وتی، "نابێت مافه‌كانی گه‌لی كورد پێشێل بكرێن".
له‌ڕاگه‌یه‌ندراوه‌كه‌ی باره‌گای بارزانیدا هاتوه‌، له‌ به‌شێكی دیكه‌ی دیداره‌كه‌دا، فه‌رمانده‌ی هێزه‌كانی سوریای دیموكرات سوپاسی مه‌سرور بارزانی سه‌رۆكی حكومه‌تی هه‌رێمی كرد بۆ بانگهێشتنامه‌كه‌ی بۆ كۆڕبه‌ندی مێپس 2025، باسی له‌ ڕۆڵی مه‌سعود بارزانی كرد له‌ به‌رامبه‌ر هه‌وڵه‌كانی له‌پێناو نزیكبونه‌وه‌ و به‌دیهێنانی یه‌كڕیزی له‌نێوان لایه‌نه‌كانی ڕۆژئاوای كوردستان و هه‌روه‌ها پاڵپشتیه‌كانی هه‌رێمی كوردستانی به‌رز نرخاند كه‌ له‌ماوه‌ی چه‌ند ساڵی ڕابردودا ده‌رگایان كراوه‌بو بۆ حه‌واندنه‌وه‌ی خه‌ڵكی رۆژئاوای كوردستان، هه‌روه‌ها پاڵپشتیه‌كانی هه‌رێمی كوردستانی له‌ تێكشكاندنی تیرۆر به‌رز نرخاند، مه‌ترسیه‌كانی سه‌رهه‌ڵدانه‌وه‌ی داعش و پشتیوانی پڕۆسه‌ی چاره‌سه‌ری ئاشتی له‌ توركیا ته‌وه‌رێكی دیكه‌ی كۆبونه‌وه‌كه‌ بون.