وەزیری بازرگانی زیاتر لە 4 ملیۆن بندیوار لە فایلی کۆبۆنی خۆراک ئاشکرا دەکات

18:49 2025-12-17 26199 عێراق 0

2025-12-17

26199

ئەمڕۆ چوارشەممە، ئەسیر داود غرێری وەزیری بازرگانی، ڕایگەیاند: زیاتر لە ٤ ملیۆن بندیوار و دووبارە و گەشتیار لە دۆسیەی کارتی بەشەخۆراکدا ئاشکرا کراون.
وەزیری بازرگانی لە وتەیەکدا لە میانی چالاکییەکانی "هەفتەی دەستپاکی نیشتمانی"، کە ئاژانسی هەواڵی موتەڵع بەدواداچوونی بۆ کردووه،رایگەیاند: "دەستپاکی تەنها دەقی یاسایی یان ڕێکاری کارگێڕی نییە، بەڵکو ڕێبازێکی ڕەفتاری دامەزراوەیی و کەلتوورێکی كۆمەڵایەتی چەسپاوە کە ڕاستەوخۆ ڕەنگدانەوەی لەسەر کارایی ئەدای کار هەیە و متمانەی هاوڵاتی بەهێز دەکات".

وتیشی: "بەرەنگاربوونەوەی گەندەڵی بەرپرسیارێتییەکی نیشتمانییە و پێویستی بە ئیرادەیەکی ڕاستگۆیانە و پابەندبوونێکی ڕاستەقینە هەیە، لەم چوارچێوەیەشدا شانازی دەکەین بەو ئەنجامە پێشکەوتووانەی وەزارەتی بازرگانی لە جێبەجێکردنی بەرنامەی حکومەتدا بەدەستی هێناوە". ئاماژەی بەوەشکرد: "وەزارەتی بازرگانی بە توندی و بەرپرسیارێتییەوە بەردەوامە لە مامەڵەکردن لەگەڵ هەر دۆسیەیەک کە گومانی گەندەڵی لەسەر بێت، و کار دەکات بۆ ڕەوانەکردنی بۆ لایەنە پەیوەندیدارەکانی دادوەری بە پشت بەستن بە بەڵگە و زانیارییە بەردەستەکان".

وەزیر جەختیشی کردەوە: لەسەر "ڕۆڵی سەرەکی هاوڵاتی لە پاڵپشتیکردنی سیستەمی دەستپاکی لە ڕێگەی ڕاگەیاندنی حاڵەتەکانی گەندەڵی یان دەستدرێژیکردنە سەر پارەی گشتی، بە جۆرێک کە هاوبەشی نێوان کۆمەڵگە و دامەزراوە چاودێرییەکان بەهێز بکات و بەشداربێت لە چەسپاندنی متمانەی دوولایەنە و پاڵپشتیکردنی هەوڵەکانی دەوڵەت بۆ جێگیرکردنی بنەماکانی حوکمڕانی". وتیشی: "وەزارەت بەردەوامە لە بەرنامەکانی گۆڕانی ئەلیکترۆنی، و گۆڕانکارییەکی ئەلیکترۆنی گەورە لە وەزارەتی بازرگانی ڕادەگەیەنرێت، لەگەڵ خستنەگەڕی بەرنامە و خزمەتگوزارییەک کە پێشتر بوونیان نەبووە، ئەمانەش دەبنە هۆی کەمکردنەوەی گەندەڵی یان دواخستن و وادەپێدان".

سەبارەت بە کارتی بەشەخۆراک، غەریری ڕوونیکردەوە کە "زیاتر لە چوار ملیۆن و چوارسەد هەزار (٤،٤٠٠،٠٠٠) هاوڵاتی لە نێوان ناوی وەهمی، دووبارە و گەشتیاردا ئاشکرا کراون، کە لە ماوەی ٢٥ ساڵی ڕابردوودا نە لەلایەن بریکار، نە خێزانەکان و نە فەرمانبەری پەیوەندیدارەوە ڕانەگەیەنراون".

لە کۆتاییدا ئاماژەی بەوەدا: "وەزارەتی بازرگانی تەنها وەزارەتی کارتی بەشەخۆراک نییە، چونکە ئەوەی لەسەرمان بووە سەبارەت بەم دۆسیەیە و ئاسایشی خۆراک ئەنجاممان داوە، جگە لە چاودێریکردنی بازاڕەکان، بەدیهێنانی هاوسەنگی نرخ، ڕێگە نەدان بە دەستکاریكەرانی نرخ، و کارکردن بە ئاراستەی ڕێکخستنی بازرگانی ناوخۆیی و دەرەکی، دەرکردنی داتای دروست، پشت بەستن بە بەئەلیکترۆنیکردن و پێشکەشکردنی خزمەتگوزاری دیکە".