عێراق پاڵپشتی لە دانوستانەکانی نێوان ئێران و ویلایەتە یەکگرتووەکانی ئەمریکا دەکات

21:24 2026-02-05 26677 عێراق 0

2026-02-05

26677

فوئاد حسێن، وەزیری دەرەوەی عێراق، ئەمڕۆ پێنجشەممە جەختی کردەوە کە عێراق پاڵپشتی لەو دانوستانانە دەکات کە لە نێوان نوێنەرانی ئێران و ویلایەتە یەکگرتووەکانی ئەمریکا لە عومان بەڕێوەدەچێت. ئاماژەی بەوەش کرد کە ناوچەکە قۆناغێکی هەستیار تێدەپەڕێنێت و ئەمەش دەخوازێت کێشەکان لە ڕێگەی گفتوگۆ و دانوستانەوە چارەسەر بکرێن و لە لۆژیکی توندوتیژی دوور بکەونەوە.
فوئاد حسێن لە کۆنگرەیەکی ڕۆژنامەوانی هاوبەشدا لەگەڵ جان نوێڵ بارۆ، هاوتا فەرەنسییەکەی، کە ئاژانسی موتەڵع بەدواداچوونی بۆ کردووە، ڕایگەیاند: دوورخستنەوەی ناوچەکە لە ئاگری شەڕ ئەرکی هەموو وڵاتانی ناوچەکەیە و عێراق پێشوازی لەو دانوستانانە دەکات کە بڕیارە سبەی لە نێوان نوێنەرانی ئێران و ئەمریکا لە عومان بەڕێوەبچێت.

هاوکات ستایشی هەماهەنگییە ئەمنی، سەربازی و هەواڵگرییەکانی نێوان عێراق و فەرەنسای کرد، هەروەها هاوکارییەکانی هەردوو وڵاتی لە بواری بەرەنگاربوونەوەی بازرگانیکردن بە مرۆڤ بەرز نرخاند.

وەزیری دەرەوە ئاماژەی بەوەش کرد کە وەزارەتی بەرگری گرێبەستێکی لەگەڵ کۆمپانیای (تالیس)ی فەرەنسی واژۆ کردووە بۆ کڕینی ڕاداری سەربازی، هەروەها پێشوازی لە بەشداریی کۆمپانیا فەرەنسییەکان کرد لە ٤٩یەمین خولی پێشانگای نێودەوڵەتیی بەغدا.

سەبارەت بە دۆسیەی سووریا، فوئاد حسێن ڕوونی کردەوە: ناسەقامگیری لە سووریا کاریگەری خراپی لەسەر بارودۆخی ناوچەکە و عێراق هەیە، بۆیە ئێمە پاڵپشتی لە ڕێککەوتنی نێوان دیمەشق و هێزەکانی سووریای دیموکرات (هەسەدە) دەکەین، چونکە هەر ناسەقامگیرییەک لەوێ کاریگەری لەسەر دۆخی ئێمە دەبێت.

لە لایەن خۆیەوە، جان نوێڵ بارۆ، وەزیری دەرەوەی فەرەنسا جەختی کردەوە کە فەرەنسا پاڵپشتی لە بەستنی سێیەمین کۆنفڕانسی بەغدا دەکات، ئاماژەی بەوەش کرد کە سەقامگیری عێراق زۆر گرنگە و وڵاتەکە گەواهی بوژانەوەیەکی بەرچاو دەدات کە جێگەی ئومێدە بۆ هەموو ناوچەکە.

بارۆ ئاماژەی بەوەش کرد کە فەرەنسا پاڵپشتی لە هەوڵە دیپلۆماسییەکان دەکات لە سایەی ئەو گرژی و مەترسییەی بۆ پەرەسەندنی سەربازی لە ناوچەکەدا هەیە، ڕاشیگەیاند کە عێراق ڕۆڵێکی گەورە دەگێڕێت لە وەرگرتنی دەستگیرکراوانی داعش و ئێمە پاڵپشتی ئەم هەڵوێستە دەکەین. هەروەها لە میانی گفتوگۆکاندا باسیان لە بارودۆخی سووریا و ڕێککەوتنی نێوان دیمەشق و هەسەدە کردووە.