ئەمڕۆ سێشەممە "عەلی عەلاق" پارێزگاری بانکی ناوەندیی عێراق، جەختی کردەوە کە نرخی ئاڵوگۆڕی دۆلار جێگیرە و ناگۆڕێت، ئاماژەی بەوەش کرد کە بانکی ناوەندی تووشی هیچ کێشەیەک نەبووە لە یەدەگی زێڕ و دراوە بیانییەکان و بەردەوامن لە خستنەبازاڕی دۆلار.
"عەلی عەلاق"پارێزگاری بانکی ناوەندی، لە وتارێکدا لە کاتی مەراسیمی ڕاگەیاندنی پڕۆژەی "E-Psule" بۆ پسوولەی ئەلیکترۆنی کە ئاژانسی موتەڵع بەدواداچوونی بۆ کردووە، ڕایگەیاند: گرنگترین تەوەرە ستراتیژییەکان لە کاروانی چاکسازی ئابووری و دارایی، گەشەپێدانی سیستەمی پارەدانی ئەلیکترۆنی و وەرچەرخانە بەرەو ئابووری دیجیتاڵی بە شێوەیەک خزمەت بە عێراق بەگشتی و هەرێمی کوردستان بەتایبەتی بکات.
ئاماژەی بەوەشکرد : کە پشتبەستنی زۆر بە نەختینە (کاش) چیتر لەگەڵ پێداویستییەکانی ئابووری مۆدێرن ناگونجێت.
وتیشی: بنیاتنانی سیستەمێکی دارایی پێشکەوتوو پێویستی بە سیستەمی ئەلیکترۆنی پارێزراو، خێرا و شەفاف هەیە کە بەشدار بێت لە بەهێزکردنی متمانە بە کەرتی بانکی و پاڵپشتیکردنی سەقامگیری دارایی.
راشیگەیاند : ساڵانی دوایی گۆڕانکاری بەرچاویان لە ژێرخانی پارەدانی ئەلیکترۆنی بەخۆوە بینیوە لە ڕێگەی فراوانکردنی بەکارهێنانی کارتە بانکییەکان و جزدانە ئەلیکترۆنییەکان، و زیادکردنی ژمارەی خاڵەکانی فرۆشتن (POS) لە دامەزراوە حکومییەکان و بازاڕە بازرگانییەکاندا، جگە لە ڕاگەیاندنی سیستەمی حەواڵە داراییە ئەلیکترۆنییەکان کە 24 کاتژمێر کار دەکەن.
عەلاق ڕوونیکردەوە: ئەم هەنگاوانە بەشدارە لە ئاسانکردنی مامەڵە ڕۆژانەییەکانی هاووڵاتییان و کەمکردنەوەی کات و ماندووبوون، هەروەها باشترکردنی کارایی سیستەمی دارایی،هەروەک باسی لەوەشکرد : کە بانکی ناوەندیی عێراق ڕۆڵێکی سەرەکی دەگێڕێت لەم چوارچێوەیەدا لە ڕێگەی دانانی ڕێساکان و ڕێنماییەکان کە سەلامەتی پرۆسەکان و پاراستنی بەکارهێنەران و پاڵپشتیکردنی داهێنانی دارایی مسۆگەر دەکات، جگە لە هاندانی کۆمپانیاکانی تەکنەلۆژیای دارایی و بەهێزکردنی گشتگیری دارایی.
هەروەک وتی: گەشەپێدانی پارەدانی ئەلیکترۆنی لە عێراق بەبێ هەماهەنگی و تەواوکاری لەگەڵ هەوڵەکان لە هەرێمی کوردستان تەواو نابێت، چونکە ئێمە لەگەڵ لایەنە پەیوەندیدارەکان لە هەرێم کار دەکەین بۆ یەکخستنی سیستەم و پێوەرە تەکنیکییەکان و فراوانکردنی خزمەتگوزارییە دیجیتاڵییە حکومی و بانکییەکان.
ئەوەشی خستەڕوو : کە تەواوکاری دارایی کۆڵەکەیەکی سەرەکییە بۆ گەشەپێدانی بەردەوام.
عەلاق لەدرێژەی قسەکانیدا وتی : دەستپێکردنی ئەمڕۆ لە ڕێگەی ئامرازێکی نوێ کە بۆ سیستەمی پارەدانی ئەلیکترۆنی و وەرچەرخانی دیجیتاڵی زیاد دەکرێت، هەنگاوێکی جۆرییە لە پەرەپێدانی ژێرخانی کەرتی دارایی و بانکی، وتیشی: ئەم ئەپڵیکەیشنە نموونەیەکی کردەیی تەواوکاری نێوان کەرتی گشتی و تایبەتە، و بەکارهێنانی تەکنەلۆژیای سەردەمە بۆ پێشکەشکردنی خزمەتگوزارییەکی پارێزراو و خێرا کە هاوتەریب بێت لەگەڵ پێشکەوتنە جیهانییەکان.
پارێزگاری بانکی ناوەندی جەختی لە پاڵپشتی تەواو بۆ ئەو دەسپێشخەرییانە کردەوە کە بەشدارن لە گەشەپێدانی خزمەتگوزارییە داراییەکان بۆ سەرجەم پارێزگاکانی عێراق، لەوانەش هەرێمی کوردستان، لە سۆنگەی گرنگی دادپەروەری لە گەیشتن بە خزمەتگوزارییە بانکییەکان و بەهێزکردنی متمانە بە سیستەمی دارایی نیشتمانی.
ئەوەشی خستە ڕوو: هەماهەنگی لەگەڵ حکومەتی هەرێم کراوە سەبارەت بە گەرەنتی جێبەجێکردنی سیستەمێکی یەکگرتوو و پارێزراو،و سوپاس و پێزانینی خۆشی بۆ سەرۆکوەزیرانی هەرێم دەربڕی کە خۆیان سەرپەرشتی ئەم پەرەپێدانە دەکەن و بەرەو ئاستێکی ڕاستەقینە دەیبەن، ئەمەش هەموومان هان دەدات بۆ هاوکاری و هەماهەنگی و تەواوکاری لەم چوارچێوەیەدا.