نێچیرڤان بارزانی: ڕێگە ناده‌ین خاکی هه‌رێم ببێته‌ سه‌رچاوه‌ی هه‌ڕه‌شه‌ بۆ سه‌ر ئێران ووڵاتانی دراوسێ

22:28 2026-03-10 31209 كوردستان 0

2026-03-10

31209

نێچیرڤان بارزانی، سه‌رۆكی هه‌رێمی كوردستان سەرپەرشتیی کۆبونەوەیەکی باڵای سەربازی و ئەمنی دەکات و رایگه‌یاند، به‌ هیچ شێوه‌یه‌ك ڕێگە نادرێت خاکی هەرێمی کوردستان ببێتە سەرچاوەی هەڕەشە و مەترسی بۆ سەر کۆماری ئیسلامیی ئێران یان هەر وڵاتێکی دیكه‌ی دراوسێ.
به‌گوێره‌ی راگه‌یه‌ندراوێكی سه‌رۆكایه‌تی هه‌رێمی كوردستان، نێچیرڤان بارزانی ئه‌مڕۆ سێشه‌ممه‌ سەرپەرشتیی کۆبونەوەیەکی باڵای سەربازی و ئەمنیی کرد کە تێیدا وەزیرانی پێشمەرگە، ناوخۆ، سوپاسالاری پێشمەرگە و فەرماندە باڵاکانی هێزی پێشمەرگە ئامادەی بون.

لە کۆبونەوەکەدا باسی دوایین پەرەسەندنە ئەمنییەکانی ناوچەکە و لێکەوتەکانی شەڕ و کاریگەرییە مەترسیدارەکانی بۆ سەر هەرێمی کوردستان كرا، هه‌روه‌ها چه‌ندین بڕیار و ڕێنمایى بۆ پته‌وكردنى پاراستنى ئاسایش و ئارامیى هه‌رێمى كوردستان و چۆنیه‌تیى مامه‌ڵه‌كردنى ده‌زگاكانى ڕاگه‌یاندن له‌گه‌ڵ ڕوداو و پێشهاته‌كاندا ده‌رچون.

نێچیرڤان بارزانی له‌ كۆبونه‌وه‌كه‌دا رایگه‌یاند، هەرێمی کوردستان بە هیچ شێوەیەک نابێتە بەشێک لە شەڕ و ململانێکان و پاراستنی ئارامیی وڵات لە پێشینەی کارەکان دەبێت.

بارزانی جەختى کرده‌وه‌ کە "به‌ هیچ شێوه‌یه‌ك ڕێگە نادرێت خاکی هەرێمی کوردستان ببێتە سەرچاوەی هەڕەشە و مەترسی بۆ سەر کۆماری ئیسلامیی ئێران یان هەر وڵاتێکی دیكه‌ی دراوسێ".
به‌گوێره‌ی راگه‌یه‌ندراوه‌كه‌، بەتوندی سەرکۆنەی ئەو هێرشە تێکدەرانە کرا کە لەلایەن گروپە لەیاسادەرچوەکانی عێراقەوە بە درۆن و موشەک دەکرێنە سەر هەرێمی کوردستان و زیانى گیانى و ماڵییان لێكه‌وتوه‌ته‌وه‌.

له‌ راگه‌یه‌ندراوه‌كه‌دا هاتوه‌، حکومەتی فیدڕاڵیی عێراق بەرپرسیاره‌ له‌وه‌ى ئه‌ركى خۆی جێبەجێ بکات بۆ ڕێگریکردن لەو هێرشانە و دۆزینەوە و سزادانی ئەنجامدەرانی، چونکە ئەم پەلامارانە پێشێلکارییەکی ڕونی سەروەریی وڵاتن و هەڕەشەن بۆ سەر سەقامگیریی گشتی.