نووری مالیکی سەرۆکی هاوپەیمانی دەوڵەتی یاسا جەختی لەوە کردەوە کە بەشداری بەرفراوان لە هەڵبژاردنەکانی داهاتوودا ئەرک و پێویستییە بۆ پاراستنی سیستمی دیموکراسی عێراق، هۆشداریشی دا کە خۆبەدوورگرتن لە بەشداریکردن دەتوانێت ببێتە هۆی لەدەستدانی شەرعیەت بۆ هەردوو پەرلەمان و حکومەت.
لە میانی وتارێکدا کە لە گردبوونەوەیەکی پشتیوانی لەیاسر مالیکی کاندیدی هاوپەیمانێتییەکە لە کەربەلا  کە موتەڵع بەدواداچوونی بۆ کردووە، مالیکی ڕایگەیاند، "بەشداری هۆشیارانە لە هەڵبژاردنەکاندا هەڵوێستێکی نیشتمانییە و بەرپرسیارێتییەکی هاوبەشە، سەرکەوتنیشی سەرکەوتنە بۆ هەموو عێراقییەکان". ئاماژەی بەوەشکرد، "ئەنجامنەدانی هەڵبژاردن شەرعیەتی تەواوی پرۆسەی سیاسی دەسەنێتەوە".
مالیکی داوای لە گەلی عێراق کرد چالاکانە بەشداری بکەن لە شکاندنی ئیرادەی ئەو کەسانەی کە دەیانەوێت بەربەست بخەنە بەردەم پرۆسەی بنیاتنانی دەوڵەت، ئاماژەی بەوەشکرد کە "هاوپەیمانی دەوڵەتی یاسا لە ڕابردوودا دەسەڵاتی بەعسیەکانی شکاند و بەردەوامە لە ڕووبەڕووبوونەوەی پاشماوەکانیان کە هەوڵی هاندانی ململانێی ناوخۆیی دەدەن".
ئاماژەی بەوەشکرد، مارەکانی ناو پاشماوەکانی بەعس تەنها لە چاندنی ئاژاوەگێڕان باشن، لە کاتێکدا ئێمە کار بۆ سەقامگیری و خۆشگوزەرانی دەکەین، و دەستەبەرکردنی دابەشکردنی دادپەروەرانەی سەروەت و سامانی وڵات. ڕوونیشی کردەوە، "هاوپەیمانی دەوڵەتی یاسا لەڕێگەی کاری مەیدانییەوە بوونی خۆی دەسەلمێنێت. ئێمە بە دەستێک شەڕمان کرد و بە دەستەکەی دیکە بینامان کرد، چەندین پڕۆژەمان بەدەستهێنا، کە هەندێکیان هێشتا لە قۆناغی دروستکردندان".
ئاماژەی بەوەشکرد، جێبەجێکردنی یاسا نوێنەرایەتی ئامانجی کۆتایی هاوپەیمانییەکە دەکات و دەڵێت "پێمان وایە دەوڵەتێک کە یاساکە تێیدا پێشێل بکرێت، سەقامگیر نابێت، بەڵکو ڕێگە خۆشدەکات بۆ گەڕانەوەی دیکتاتۆری، هەر بۆیەش لە باوەڕمان بەم پرەنسیپە، ناوی فراکسیۆنەکەمان ناوە 'دەوڵەتی یاسا'"
مالیکی لە درێژەی قسەکانیدا ئاماژەی بەوەدا کە لە ئامانجە سەرەکییەکانی هاوپەیمانییەکە پاراستنی دیموکراسی و ڕێگریکردن لە گەڕانەوەی تایفەگەری یان ستەمکارییە، جەختی لەسەر پابەندبوونی خۆی بە "عێراقێکی دیموکراسی، فیدراڵی، دەستووری کە ڕێگری لە ئیستغلالکردنی دەسەڵات یان دەربازبوون لە ئیرادەی گەل بکات"کردەوە.
ئاماژەی بەوەشکرد، مەرجەعییەتی باڵای ئایینی جەخت لە بەشداریکردن لە هەڵبژاردنەکاندا دەکاتەوەو دەستکاریکردنیان یان بەکارهێنانی سامانی دەوڵەت قەدەغە دەکات، ئاماژەیشیدا کە "عێراق بەهۆی توانا  فراوانە مرۆییەکانییەوە ڕووبەڕووی ئامانجکردنی بەردەوام دەبێتەوە، کە جیهان لێی دەترسێت، چونکە دەوڵەتێکی بەهێز و سەربەخۆ دروست دەکەن".
مالیکی زیادی کرد، نوخبە و لێهاتووییەکانی عێراق "بەردی بناغەی بنیاتنانی عێراقێکی ئاوەدان"ن، جەختیشی لە ڕەتکردنەوەی هەر جۆرە جیاکارییەک لە نێوان پێکهاتەکان یان ناوچەکانی وڵات لە ڕووی خزمەتگوزاری یان ئاستی ژیانەوە کردەوە.
مالیکی لە کۆتایی قسەکانیدا خوازیاری هەڵوێستێکی پتەوی دژ بە ئاسایی بوونەوە لەگەڵ قەوارەی زایۆنیستی بوو و هۆشداری دا لە بەرامبەر "پڕۆژە گوماناوییە ناوخۆیی و دەرەکییەکان کە یەکگرتوویی و سەقامگیریی عێراق دەکەنە ئامانج".