سەرۆک کۆمار پێشوازی لە باڵیۆزی ڤاتیکان دەکات
سەرۆک کۆمار دکتۆر لەتیف جەمال ڕەشید، ئەمڕۆ چوارشەممە 6-12-2023 ، لە کۆشکی بەغداد، پێشوازیکرد لە بەڕێز میتیجیا لسکۆڤار، باڵیۆزی دەوڵەتی ڤاتیکان لە عێراق .
بەگوێرەی راگەیەندراوێکی سەرۆکایەتی کۆمار لە دیدارەکەدا باس لە پەیوەندییە دووقۆڵییە بەهێزەکانی نێوان هەردوو وڵاتی دۆست و چۆنیەتی پەرەپێدانیان کرا، کە تیایدا سەرۆک کۆمار ئاماژەی بە گرنگی فراوانکردنی ئاسۆی هاریکاری و هەماهەنگی هاوبەش کرد بۆ برەودان بە کلتووری پێکەوەژیان و دیالۆگ و بڵاوکردنەوەی ئاشتی و بەهێزکردنی بناغەکانی لە ناوچەکە و جیهاندا.
سەرۆک کۆمار باسی لە سەردانەکەی کرد بۆ ڤاتیکان و پەرۆشی پاپا وپشتیوانیکردنی لەسەقامگیری و ئاسایش لەعێراق و گەلەکەی و بڵاوکر دنەوەی خۆشەویستی و لێبوردەیی لەنێو گەلان، هەروەها سوپاس و پێزانینی خۆی بۆ قەداسەتی پاپا دەربڕی بۆ ئەو میوانداری و پێشوازییە گەرمەی لە میانەی سەردانەکەی ئەم دواییەیدا بۆ ڤاتیکان.
لەلای خۆیەوە، بەڕێز لسکۆڤار سوپاسی هەوڵەکانی بەڕێزیانی کرد بۆ چەسپاندنی پێکەوەژیانی ئاشتییانە و هەماهەنگی لەنێوان پێکهاتە عێراقییەکان و گرنگیدانی بە بارودۆخی کریستیانەکان لە عێراق و پەرۆشی خۆی بۆ گەڕانەوەی ئاوارەکان بۆ ناوچەکانیان.
