ئەمڕۆ پێنجشەممە ،وتەبێژی حكومەت باسم عەوادی رایگەیاند، پێنج دەستپێشخەری عێراق لە كۆبوونەوەی وەزیرانی دەرەوەی وڵاتانی عەرەبیدا پەسەندكرا،پرسی فەلەستینیش گرنگترین تەوەری دەستپێشخەریەگە بوو.
‏
‏عەوادی بە ئاژانسی هەواڵی فەرمی ڕاگەیاند: گرنگترین بابەتی ناو بەرنامەی وەزاری كە لە لوتكەی 34 لە بەغداد پێشكەش بە سەركردە عەرەبییەكان كراوە، چەند دۆسیەیەکم كە دوو ڕاپۆرتیان تێدایە: یەكەمیان ڕاپۆرتی لوتكەی 33ی پێشوو و بەڵێنەكانی جێبەجێكردنی، هەروەها ڕاپۆرتی ئەمینداری گشتی كۆمكاری عەرەبی سەبارەت بە كاری هاوبەشی عەرەبی.
‏وتیشی: لە بەرنامەكەدا كۆمەڵێك بابەت تاوتوێ كران، لەوانە پرسی فەلەستین، ململانێی عەرەبی و زایۆنیی و پێشهاتەكانی. پێنج بڕگە بە وردی خراونەتەڕوو، تەوەرەكەی تریش كاروباری عەرەبی و ئاسایشی نەتەوەیی بووە، كە 11 بابەتی عەرەبی یان قەیرانی عەرەبی لەخۆگرتبوو لەگەڵ وردەكاری.
‏رونیشیكردەوە: ئەو بابەتانەی كە مابوونەوە بریتیبوون لە گۆڕانی كەشوهەوا و ئاسایشی هاوبەشی عەرەبی و شوێنی بەڕێوەچوونی سی و شەشەمین لوتكەی عەرەبی كە لە داهاتوودا بەڕێوەدەچێت، هەروەها دەستپێشخەری و كاندیدكردنی عەرەبی بۆ پۆست لە دامەزراوە ناوچەیی و نێودەوڵەتییەكان.
‏عەوادی ئاشكرایكرد، دەستپێشخەرییە عێراقییەكان لە كۆبوونەوەی ئەمڕۆی ئەنجومەنی وەزیرانی دەرەوەی عەرەبی پەسەند كران، لەوانە؛
‏1-    دەستپێشخەری بۆ دامەزراندنی ناوەندی عەرەبی بۆ بەرەنگاربوونەوەی تیرۆر.
‏2-     دەستپێشخەری بۆ دامەزراندنی ناوەندێكی عەرەبی بۆ بەرەنگاربوونەوەی ماددەهۆشبەرەكان
‏3-     دەستپێشخەری بۆ دامەزراندنی ناوەندێكی عەرەبی بۆ بەرەنگاربوونەوەی تاوانی نیشتمانی.
‏4-    دەستپێشخەری بۆ دامەزراندنی ژوورێكی هاوبەشی هەماهەنگی ئەمنی عەرەبی.
‏5-     دەستپێشخەری سندوقی عەرەبی بۆ پاڵپشتیكردنی هەوڵەكانی بوژانەوە و ئاوەدانكردنەوە لە كاریگەرییەكانی قەیرانەكان.
‏بەرەبەیانی ئەمڕۆ لە بەغداد بە سەرپەرشتی فوئاد حسێن جێگری سەرۆك وەزیران و وەزیری دەرەوەی عێراق كۆبوونەوەی ئامادەكاری وەزیرانی دەرەوەی عەرەبی بۆ سی و چوارەمین لوتكەی عەرەبی بە بەشداری ئەحمەد ئەبوغەیت سكرتێری گشتیی كۆمكاری عەرەبی دەستیپێكرد.
‏لە دانیشتنی دەستپێكی كۆبوونەوەكەدا، لەلایەن عەبدوللەتیف زەیانی وەزیری دەرەوەی شانشینی بەحرەین وتارێكی پێشكەشكرا، وەك وڵاتی سەرۆكایەتی دانیشتنی پێشووی كرد. پاشان  فوئاد حسێن وەزیری دەرەوە لە كاتێكدا كە عێراق سەرۆكایەتیی دانیشتنی ئێستای دەكات و دواتر ئەمینداری گشتی كۆمكاری دەوڵەتانی عەرەبی، قسەی كرد.
‏عەوادی ئاماژەی بەوەشكرد: وەزیرانی دەرەوەی عەرەب دوای دانیشتنی كردنەوەی كۆبوونەوەكە دانیشتنێكی داخراویان ئەنجامدا بۆ پێداچوونەوە و پەسەندكردنی ڕەشنووسی كارنامەی لوتكەكە و ڕەشنووسی بڕیارنامەكان، بە ئامانجی پێشكەشكردنی بە سەركردە عەرەبییەكان بۆ پەسەندكردن.
‏رونیشیكردەوە: كارنامەكە هەشت بڕگەی سەرەكی لەخۆدەگرێت كە پرسە جیاجیاكانی كردەوەی هاوبەشی عەرەبی دەگرێتەوە، دیارترینیان پرسی فەلەستین، ئاسایشی نەتەوەیی عەرەبی، و شەڕی دژی تیرۆرە، وەك ئامادەكارییەك بۆ پێشكەشكردنی ئەو پڕۆژانە بۆ سەركردە و سەرۆكی دەوڵەت و حكومەتەكانی ئەنجومەنی كۆمكاری عەرەبی لە ئاستی لوتكەدا لە میانی دانیشتنی 34هەمیندا.
‏جەختیشی كردەوە: وەزیرانی دەرەوەی عەرەب كۆبوونەوەیەكی ڕاوێژكاری داخراویان لە بەغدای پایتەخت ئەنجامدا، پێش دەستپێكردنی كۆبوونەوەی وەزیری ئامادەكاری بۆ ئەنجومەنی كۆمكاری عەرەبی لە ئاستی لوتكەدا، بۆ هەماهەنگی و ڕاوێژكردن لەسەر دیارترین پرسەكانی كارنامەی لوتكە، لە پێشەنگی ئەوانەش پێشهاتەكانی پرسی فەلەستین، دوایین پێشهاتەكانی ژمارەیەك وڵاتی عەرەبی، هەروەها پرسە هەرێمی و نێودەوڵەتییەكان كە كاریگەرییان لەسەر ئاسایشی نیشتیمانی عەرەبی هەیە.
‏عەوادی لە درێژەی قسەكانیدا، وتی:  وەزیرەكان لە كۆبوونەوەی ڕاوێژكاری داخراویاندا، هەڵوێستە هاوبەشە عەرەبییەكانیان لەسەر پرسە مشتومڕاوییەكان تاوتوێ كرد و ڕێككەوتن لەسەر داڕشتنی ئەو بڕیارنامانەی كە دەخرێنە بەردەم كۆبوونەوەی فەرمی وەزاری، ئەمەش وەك ئامادەكارییەك بۆ پەسەندكردنیان لە كۆبوونەوەی لوتكەی سەركردەكان كە بڕیارە شەممەی داهاتوو لە بەغدا بەڕێوەبچێت.
‏ڕوونیشیكردەوە: ئەم كۆبوونەوەی ڕاوێژكارییە هەنگاوێكی تەقلیدییە كە پێش كۆبوونەوە فەرمییەكان دێت، و ئامانجی بەرزكردنەوەی هەماهەنگیی سیاسییە لە نێوان وڵاتانی ئەندام و ئاسانكاری بۆ كۆدەنگی لەسەر ئەو پرسانەی خراوەتەڕوو، بەمەش بەشدارە لە سەركەوتنی لوتكە و بەهێزكردنی كاری هاوبەشی عەرەبی.
‏عەوادی تەئكیدیكردەوە: ئەمڕۆ لیژنەی بەدواداچوونی لوتكەی عەرەبی، بە سەرۆكایەتی شانشینی بەحرەین، پێش كۆبوونەوەی وەزیرانی دەرەوەی عەرەبی، كۆبوونەوەیەكی ئەنجامدا بۆ ئامادەكردن و پەسەندكردنی ڕاپۆرتی لیژنەكە، كە لەلایەن نوێنەرانی هەمیشەیی سەبارەت بە بەدواداچوون بۆ جێبەجێكردنی بڕیارەكانی لوتكەی عەرەبی پێشوو كە لە شانشینی بەحرەین بەڕێوەچوو، پێشكەشكرا.
‏دەستەی بەدواداچوون بۆ جێبەجێكردنی بڕیار و بەڵێنەكانی لوتكەی عەرەبی پێكدێت لە ترۆیكای لوتكەی عەرەبی: شانشینی بەحرەین وەك سەرۆك، شانشینی سعودیە و كۆماری عێراق، هەروەها ترۆیكای ئەنجومەنی وەزیرانی عەرەبی: ئوردن و یەمەن و ئیمارات، ئەوە جگە لە ئەمینداری گشتی كۆمكاری وڵاتانی عەرەبی.
‏