محەمەد شیاع سودانی، سەرۆک وەزیرانی عێراق، ئەمڕۆ پێنجشەممە جەختی لە پەرۆشیی عێراق کردەوە بۆ بنیاتنانی بەهێزترین پەیوەندی لەگەڵ فەرەنسا، هاوکات ئاماژەی بە پاڵپشتی بەغدا بۆ گفتوگۆی نێوان ئێران و ویلایەتە یەکگرتووەکانی ئەمریکا کرد.
نووسینگەی ڕاگەیاندنی سەرۆک وەزیران لە ڕاگەیەندراوێکدا کە دەستی ئاژانسی موتەڵع کەوتووە، ئاماژەی بەوە کرد: محەمەد شیاع سودانی، سەرۆک وەزیران، ئەمڕۆ پێشوازی لە جان نوێڵ بارۆ، وەزیری دەرەوەی فەرەنسا کرد.

سەرۆک وەزیران دووپاتی کردەوە پەرۆشیی عێراق بۆ بنیاتنانی بەهێزترین پەیوەندی لەگەڵ فەرەنسا، بەتایبەتی لە لایەنی ئابووریدا، و ڕەخساندنی دەرفەت بۆ کۆمپانیا فەرەنسییەکان تا سەردانی عێراق بکەن و هەماهەنگی بکەن بۆ دروستکردنی هاوبەشیی بەهێز لەگەڵ کۆمپانیا عێراقییەکان بە ئامانجی بەهێزکردنی هاوکارییە ئابووری و بازرگانییەکانی نێوان هەردوو وڵات و بەشداریکردن لە کاروانی گەشەپێدان و ئاوەدانکردنەوەدا. هەروەها پێشوازی لە بەشداریی کۆمپانیا فەرەنسییەکان کرد لە پێشانگای نێودەوڵەتیی بەغدا.

ڕوونیشیکردەوە کە عێراق بەرپرسیارێتییەکی گەورەی لەجیاتی کۆمەڵگەی نێودەوڵەتی گرتووەتە ئەستۆ، کە دواترینیان گواستنەوەی تیرۆریستان بوو لە زیندانەکانی سووریاوە، و پێویستە ئەمڕۆ جیهان لەم کاتە هەستیارەدا پاڵپشتی عێراق بکات، و وڵاتان بەرپرسیارێتی خۆیان هەڵبگرن لە ڕێگەی وەرگرتنەوەی هاووڵاتییەکانیان؛ چونکە ئەم بابەتە مەترسییەکی هاوبەشە. جەختیشی کردەوە لەسەر بەردەوامبوونی هاوکاری لەگەڵ فەرەنسا بۆ گەشەپێدانی تواناکانی بەرگریی عێراق.

سەبارەت بە گفتوگۆ چاوەڕوانکراوەکانی نێوان ئێران و ویلایەتە یەکگرتووەکانی ئەمریکا، سودانی ئاماژەی بەوە کرد کە جیهان و ناوچەکە قۆناغێکی زۆر هەستیار تێدەپەڕێنن، و جەختی لە پاڵپشتی عێراق بۆ گفتوگۆ کرد، بەهۆی گرنگییەکەی لە گەیشتن بە چارەسەری ئاشتییانە.

لای خۆیەوە، بارۆ سڵاوی ئیمانوێل ماکرۆن، سەرۆکی فەرەنسای گەیاندە سەرۆک وەزیران و ستایشی ڕۆڵی سەرۆک وەزیرانی کرد لە پاراستنی ئاسایش و سەقامگیری لە عێراق و ناوچەکەدا، هەروەها هەوڵەکانی لە ئاوەدانکردنەوەی عێراقدا بەرز نرخاند.

وەزیری دەرەوەی فەرەنسا جەختی لە ئارەزووی کۆمپانیا فەرەنسییەکان بۆ کارکردن لە عێرا" کردەوە و ئاماژەی بە بەشداریی ٢٠ کۆمپانیای فەرەنسی لە کەرتە جیاوازەکاندا کرد لە پێشانگای نێودەوڵەتیی بەغدا.

هەروەها ئارەزووی وڵاتەکەنی دەربڕی بۆ کارکردن لەگەڵ عێراق لەپێناو سەقامگیری ناوچەکە و هەماهەنگی هەوڵەکان بۆ لەناوبردنی تیرۆر. ستایشی ڕۆڵی عێراقی کرد لە گواستنەوەی زیندانییە تیرۆریستەکان وەک هەنگاوێک کە بەشدار دەبێت لە بەدیهێنانی ئاسایشی هەرێمی، و ئامادەیی فەرەنسای نیشاندا بۆ دابینکردنی پاڵپشتی لە دۆسیەی تیرۆریستە زیندانیکراوەکاندا