سەرۆكی حكوومەتی هەرێم بۆ پارێزگاری هەولێر: ئەوەی پێویستە بۆ پاراستن و سەلامەتی گیانی هاووڵاتییان ئەنجامی بدەن
ئەمڕۆ سێشەممە 2024.3.19، مەسرور بارزانی، سەرۆكی حكومەتی هەرێمی كوردستان، لە پەیوەندییەكی تەلەفۆنییدا لەگەڵ ئومێد خۆشناو، پارێزگاری هەولێر، سەبارەت بەو شەپۆلە بەهێزەی بارانبارین كە ناوچەكەی بەگشتیی گرتۆتەوە، بەدواداچوونی بۆ ڕەوشەكە و ئامادەكارییەكانی پارێزگای هەولێر كرد و لەلایەن پارێزگاری هەولێرەوە ڕوونكردنەوەی پێویست سەبارەت بە ئامادەباشی سەرجەم فەرمانگە و لایەنە پەیوەندیدارەكان بۆ هەر ئەگەر و ڕووداوێكی چاوەڕواننەكراو و ئیدارەدانی حاڵەتی ئەو ڕێژە بارانبارینەی ئەمڕۆ و كۆنتڕۆڵكردنی بارودۆخەكە پێشكەش بە بەڕێزیان كرا.
هەروەها پارێزگاری هەولێر، تیشكی خستە سەر سەرجەم ئەو پلان و بەرنامە و پڕۆژە و ڕێگە چارەسەرییە پێویستانەی كە لەماوەی ڕابردوودا بە پاڵپشتی ڕاستەوخۆی جەنابی سەرۆكی حكومەتی هەرێمی كوردستان لە سنووری پارێزگای هەولێر بۆ بەرەنگاربوونەوەی مەترسییەكانی ڕوودانی لافاو و هۆكارەكانی جێبەجێكراون و بەهۆیانەوە تا ئاستێكی زۆر مەترسیەكانی دروستبوونی لافاو لە شاری هەولێر كەمبۆتەوە.
سەرۆكی حكومەتی هەرێمی كوردستان وێڕای دەستخۆشی، فەرمانی كرد ئەوەی پێویست بێت بۆ پاراستن و سەلامەتی گیانی هاوڵاتییان بكرێت و ئامادەیی حكومەتی هەرێمی كوردستانیشی بۆ هەر هاوكارییەكی بەپەلە و پێویست دووپاتكردووەتەوە.
