دەزگا هەواڵگرییەكانی هەردوو حكومەتی فیدراڵی عێراق و حكومەتی هەرێم کۆبوونەوە
نوسینگەی راگەیاندنی قاسم ئەعرەجی، راوێژكاری ئاسایشی نیشتمانیی عێراق لە راگەیەندراوێكدا بڵاویکردۆتەوە، لەسۆنگەی جێبەجێكردنی فەرمانەكانی فەرماندەی گشتیی هێزە چەكدارەكانی عێراق، ئەمرۆ سێشەممە ئەنجومەنی هەواڵگریی نیشتمانیی عێراق لە هەولێر لەگەڵ ئەنجومەنی ئاسایشی هەرێمی كوردستان بە ئامادەبونی فەرماندەو نوێنەرانی دەزگا هەواڵگرییەكانی هەردو حكومەتی فیدراڵ و حكومەتی هەرێم هەروەها بە ئامادەبونی قاسم ئەعرەجی و رێبەر ئەحمەد، وەزیری ناوخۆی هەرێم، كۆبونەوە.
بەگوێرەی راگەیەندراوەكە، لە كۆبونەوەكەدا چەند بابەت و پرسێكی جێی بایەخی هاوبەش تاوتوێ كراون لەنێویاندا ئەو ئاڵەنگارییانەی روبەڕووی چەند دۆسیەیەكی هاوبەشی نێوان حكومەتی عێراق و حكومەتی هەرێم دەبنەوە، ئەوەش لەپێناو دۆزینەوەی چارەسەری گونجاو بۆ ئەو ئاڵەنگارییانە.
وەك لە راگەیەندراوەكەدا هاتوە، بەشدارانی كۆبونەوەكە تاوتوێی بەردەوامیی هەماهەنگی هاوبەش، ئاڵوگۆڕی زانیاری و گرنگی یەكخستنی گۆڕەپانی كاری هەواڵگرییان كردوە ئەوەش لەپێناو كامڵكردنی ئەدای چالاكییە ئەمنی و هەواڵگرییەكان.
هەر بەپێی راگەیەندراوەكە، لە كۆبونەوەكەدا رێككەوتن كرا لەسەر بەردەوامی كۆبونەوەو دیدارەكان لەپێناو عێراقێكی یەكگرتو و ئاسایشێكی بەردەوام.
